WAZIRI MKUU AAGIZA MPANGO WA KUIMARISHA USHIRIKIANO NA TAASISI ZA DINI KATIKA ELIMU

WAZIRI MKUU Dkt. Mwigulu Nchemba amemwelekeza Waziri wa Elimu, Sayansi na Teknolojia, Profesa Adolf Mkenda, kuandaa mpango wa kuimarisha ushirikiano kati ya Serikali na taasisi za dini katika elimu, kwa kuzingatia uzoefu wa ushirikiano uliopo katika sekta ya afya.

Ametoa maelekezo hayo leo (Jumapili, Novemba 1, 2026), wakati akimwakilisha Mheshimiwa Rais Dkt. Samia Suluhu Hassan katika ibada ya uzinduzi wa nyumba mpya ya ibada ya Bethel ya Kanisa la Kiinjili la Kilutheri Tanzania (KKKT), Usharika wa Nshara, wilayani Hai, mkoani Kilimanjaro.

CHONDO: USHIRIKIANO NA WAKULIMA WAIPELEKA MUHEZA KILELENI

Na Mwandishi Wetu

HALMASHAURI ya Wilaya ya Muheza mkoani Tanga imewataka wawekezaji kutumia fursa zilizopo katika sekta ya kilimo kwa kuwekeza katika uzalishaji wa mazao ya kisasa na viwanda vya kuchakata bidhaa za kilimo ili kuongeza thamani na kipato cha wakulima.

Wito huo umetolewa kufuatia ushindi wa kitaifa uliotwaa na halmashauri hiyo katika Maonyesho ya Wiki ya Chakula na Lishe Duniani yaliyofanyika katika Viwanja vya Usagara, jijini Tanga, ambapo ilionesha uwezo wake katika uzalishaji wa mazao na mnyororo wa thamani kuanzia shambani hadi sokoni.

Mkurugenzi Mtendaji wa Halmashauri ya Wilaya ya Muheza, Naima Chondo, amesema ushindi huo umetokana na maandalizi mazuri na juhudi za kuwawezesha wakulima wadogo kushiriki maonyesho hayo, kujifunza teknolojia mpya za kilimo na kupata fursa ya kuonesha ubora wa mazao yao.

Amesema Muheza ina ardhi yenye rutuba inayofaa kwa uzalishaji wa mazao mbalimbali, hivyo kuifanya wilaya hiyo kuwa na fursa za uwekezaji katika kilimo na biashara. Ameongeza kuwa ushiriki wa wakulima katika maonyesho hayo umewapa nafasi ya kujifunza mbinu zinazoweza kuongeza tija na thamani ya bidhaa zao.

Kwa upande wake, Mkuu wa Wilaya ya Muheza, Ayubu Sebabili, amesema wilaya hiyo imetenga maeneo kwa ajili ya kilimo cha kisasa na ujenzi wa viwanda vya kuchakata mazao ili kuongeza thamani ya bidhaa na kupanua fursa za ajira na biashara.

Amezitaja baadhi ya fursa zilizopo kuwa ni kilimo cha mahindi, ndizi na mazao ya viungo kama karafuu, iliki na mdalasini, ambayo yanaweza kunufaisha wakulima na wafanyabiashara kupitia masoko ya ndani na nje ya nchi.

Sebabili amesema wilaya hiyo inapanga kufanya kongamano la wadau wa kilimo litakalowakutanisha wakulima, wafanyabiashara, taasisi za fedha na wawekezaji ili kuweka mikakati ya pamoja kuelekea msimu ujao wa kilimo.

Naye Mkuu wa Mkoa wa Tanga, Dkt. Batilda Buriani, amesema mkoa huo una fursa za kiuchumi zinazohusishwa na upanuzi wa Bandari ya Tanga, Bomba la Mafuta na uwekezaji katika kilimo na viwanda. Amewahimiza wawekezaji kutumia fursa hizo kuongeza uzalishaji wa chakula na kukuza uchumi.

Dkt. Buriani ametoa shukrani kwa Wizara ya Kilimo, Wizara ya Mifugo na Uvuvi, Shirika la Chakula Duniani (WFP) na wadau wengine walioshiriki maonyesho hayo yenye kaulimbiu isemayo “Ubunifu wa Leo, Lishe Bora ya Kesho, Kuelekea Dira 2050.”

TADB YAWEKEZA SHILINGI BILIONI 668.03 KUCHOCHEA MAPINDUZI YAMNYORORO WA THAMANI WA KAHAWA

-Ufadhili wa moja kwa moja wafikia wanufaika 313,882, huku SCGS ikiwezesha zaidi yaShilingi bilioni 192 kwa kupitia taasisi washirika za kifedha

TRA YAWATAKA WAFANYABIASHARA KARIAKOO KUZINGATIA SHERIA ZA KODI

Kariakoo, 25 Septemba, 2026

Mamlaka ya Mapato Tanzania (TRA), Mkoa wa Kikodi Kariakoo, imewataka wafanyabiashara wa Kariakoo kutumia fursa ya Kariakoo Festival 2026 kupata elimu kuhusu masuala ya kodi, ikiwemo haki na wajibu wao kama walipakodi, huku ikisisitiza umuhimu wa uzingatiaji wa hiari wa sheria za kodi.

RC TANGA: WASTAAFU LINDENI MAFAO YENU, TUMIENI MIFUMO YA KIDIJITALI

Mkuu wa mkoa wa Tanga, Balozi Dkt. Batilda Burian akizungumza katika semina ya PSSSF kwa maafisa Rasilimaliwatu wa mkoa wa Tanga kilichofanyika mapema leo Septemba 17, 2026 ikiwa na lengo la kuwaelimisha huduma mbalimbali zitolewazo na Mfuko na hasa kuwahamasisha kuwasilisha madai ya wanachama kwa wakati na matumizi ya kidigitali.



NA MWANDISHI WETU, TANGA

Mkuu wa Mkoa wa Tanga, Balozi Dkt. Batilda Burian amewataka wastaafu kulinda mafao yao dhidi ya matapeli, huku akiupongeza Mfuko wa Hifadhi ya Jamii kwa Watumishi wa Umma (PSSSF) kwa kuhamasisha matumizi ya mifumo ya kidijitali inayorudisha heshima na tabasamu kwa wastaafu.


Akifungua semina ya PSSSF kwa waajiri iliyofanyika jijini Tanga iliyowakutanisha Maafisa Rasilimaliwatu na Utawala 120 kutoka taasisi mbalimbali za Serikali, Balozi Dkt. Batilda alieleza kuwa maboresho hayo yanaendana na maagizo ya Rais Dkt. Samia Suluhu Hassan ya kutoa huduma bora, za haraka na bila vikwazo. "Niwapongeze sana PSSSF kwa hatua hii inaowezesha Mafao kulipwa kwa haraka," alisema.

Meneja wa PSSSF Kanda ya Kaskazini Mashariki, Kwame Temu, aliwahimiza waajiri kutoa taarifa za watumishi wapya ndani ya siku 30 ili wasajiliwe mapema na kuwahamasisha watumishi kutumia kikamilifu mifumo ya kielektroniki. Kwa upande wake, Afisa Mfawidhi wa Mkoa wa Tanga, Bi. Hanim Babika, alisisitiza waajiri kufanyia kazi changamoto ya kugongana kwa taarifa na kuhakikisha wafanyakazi wa mikataba kusajiliwa.

Akitoa ushuhuda, Katibu Tawala wa Mkoa wa Tanga, Bw. Rashid Mchatta alisema elimu inayotolewa na PSSSF imebadili kabisa maisha ya wastaafu wa sasa, kwani wanatoka utumishi wakiwa wanajiamini na wenye uelewa mpana wa uwekezaji. "Sekretari wangu alipostaafu, alikuja ofisini kwangu mwenye furaha, ananieleza habari za fursa za uwekezaji tu baada ya kupata mafunzo ya PSSSF," alisema Katibu Tawala.

PSSSF inaendelea kuwasihi wanachama na wastaafu nchini kutumia mifumo rasmi ya kielektroniki ili kupata huduma kwa haraka, uwazi na usalama zaidi ambayo ni PSSSF Member Portal na PSSSF Kiganjani, aidha wawawe na changamoto kutumia simu ya bure kuwasiliana na Mfuko ambazo ni 0800110055.

Meneja wa PSSSF Kanda ya Kaskazini Mashariki, Bw. Kwame Temu akizungumza katika semina kwa maafisa Rasilimaliwatu na Utawala wa Mkoa wa Tanga.

DKT. MWIGULU: NDANI YA WIKI MOJA TUTACHUKUA HATUA KUSHUSHA BEI YA SARUJI

WAZIRI MKUU Dkt. Mwigulu Nchemba amesema ndani ya wiki moja, Serikali itachukua hatua ya kuhakikisha bei ya saruji inakuwa himilivu kwa wananchi, baada ya kubaini malalamiko ya kupanda kwa bei ya bidhaa hiyo katika mikoa mbalimbali nchini ikiwemo Simiyu.

Ametoa kauli hiyo jana (Jumanne, Septemba 15, 2026) wakati akizungumza na wananchi wa Bariadi Mjini, mkoani Simiyu katika mkutano wa hadhara uliofanyika kwenye viwanja vya CCM Saba Saba.

“Serikali tumeliona hilo. Serikali sikivu tumesikia hilo. Nimewatuma wataalamu ndani ya wiki moja wawe wameshapata ufumbuzi. Tutatoa tamko la njia ya kushusha bei ya saruji ili kila Mtanzania aweze kumudu. Katika baadhi ya maeneo bei ya saruji imefikia zaidi ya sh. 26,000 na katika baadhi ya mikoa ya mipakani imefikia sh. 32,000,” amesema na kusisitiza kuwa Serikali inataka wananchi waweze kumudu gharama za ujenzi wa nyumba na miradi mingine ya maendeleo.

Kuhusu zao la pamba, Waziri Mkuu amesema ameielekeza Wizara ya Kilimo ikutane na wadau wa pamba ndani ya mwezi mmoja na ifikapo Oktoba 15, 2026 apelekewe mapendekezo rasmi kuhusu bei na mfumo bora wa ununuzi wa zao hilo ili kuhakikisha wakulima wananufaika zaidi.

“Nimeipokea hoja hii. Nimeelekeza Wizara ya Kilimo ikae na wadau wa pamba ndani ya mwezi mmoja. Ifikapo tarehe 15 mwezi wa 10, niwe nimeshapata mapendekezo rasmi yaliyorejea mifumo ambayo tumeshaitumia na kubaini upi ni mfumo bora ili tuweze kuhakikisha kwamba wakulima wananufaika,” amesema.

Katika hatua nyingine, Waziri Mkuu amesema pia Serikali imebadilisha utaratibu wa kodi kwa wenye biashara mpya, ambapo mfanyabiashara anayeanzisha biashara atapewa muda wa kuimarisha biashara yake kabla ya kuanza kubeba mzigo wa kodi. “Zamani ilikuwa mtu akianzisha tu biashara, siku hiyo hiyo anaanza kudaiwa kodi. Sasa tumefuta, atasubiriwa mwaka mzima ili biashara yake iimarike,” amesema.

Amesema hatua hizo ni sehemu ya utekelezaji wa Dira ya Maendeleo ya 2050 inayolenga kujenga uchumi shirikishi, ambapo sekta binafsi inatarajiwa kutekeleza sehemu kubwa ya shughuli za maendeleo.

Mapema, akizungumza katika mkutano huo, Mbunge wa Bariadi Mjini ambaye pia ni Naibu Waziri wa Maji, Mhandisi Kundo Andrea Mathew, amemshukuru Waziri Mkuu kwa ziara hiyo na kueleza kuwa Serikali imeendelea kutekeleza miradi mbalimbali ya maendeleo katika jimbo hilo ikiwemo inayogusa sekta za maji, elimu, afya na barabara.

Mhandisi Kundo amesema mradi mkubwa wa maji kutoka Ziwa Victoria wenye thamani ya sh. bilioni 440 unaendelea kutekelezwa mkoani humo, huku Serikali ikiwa imetoa sh. milioni 460 kupitia TARURA kwa ajili ya ujenzi wa daraja la Majaida–Munambala katika Mto Ndoba.

Kuhusu ujenzi wa soko la kisasa la Bariadi mjini, Mhandisi Kumndo amesema ujenzi wake unaendelea, huku akiomba kasi ya mkandarasi iongezwe ili mradi huo ukamilike kwa wakati.

Akigusia barabara za Bariadi Mjini, Mhandisi Kundo amesema Serikali imeweka mpango wa kuhakikisha kilomita zote 8.6 zilizotengewa ujenzi zinajengwa kwa awamu mbili, ambapo kilomita tano zitajengwa katika awamu ya kwanza.

Kwa upande wake, Mkuu wa Mkoa wa Simiyu, Said Mtanda, amesema Serikali ya Mkoa itasimamia na kutekeleza maelekezo yote yaliyotolewa na Waziri Mkuu wakati wa ziara hiyo na kuwasilisha taarifa ya utekelezaji katika Ofisi ya Waziri Mkuu.

“Maagizo na maelekezo yako uliyoyatoa katika ziara yako hii tunayasimamia, tuyatekeleze, na kuleta ripoti ya utekelezaji katika ofisi yako ya Waziri Mkuu,” amesema.