SERIKALI YACHUKUA HATUA KUMALIZA MGOGORO WA SHAMBA LA TVLA MIVUMONI

Mkuu wa Mkoa wa Tanga, Mhe. Balozi Dkt. Batilda Burian, akizungumza na wananchi wa Kijiji cha Kigurusimba, Wilaya ya Pangani mkoani Tanga (hawapo pichani), Novemba 3, 2026, kuhusu hatua za kutatua mgogoro wa muda mrefu wa uvamizi wa Shamba la Serikali la Utafiti na Mifugo Mivumoni, linalosimamiwa na Wakala ya Maabara ya Veterinari Tanzania (TVLA), chini ya Wizara ya Mifugo na Uvuvi.

TANZANIA YAFANYA MAZUNGUMZO NA KAMPUNI ZA KIMATAIFA ZA NISHATI JUA NCHINI INDIA

📌*Lengo ni kuongeza uzalishaji na usambazaji wa nishati jua nchini*

Tanzania imeendelea kushiriki mijadala mbalimbali inayolenga kuendeleza matumizi ya nishati ya jua duniani katika Mkutano Mkuu wa Tisa wa Muungano wa Kimataifa wa Nishati ya Jua (ISA) unaofanyika New Delhi, India, sambamba na kufanya mazungumzo na kampuni mbalimbali za kimataifa zinazojishughulisha na teknolojia ya nishati hiyo.

Mazungumzo na kampuni hizo za nishati jua yamefanyika tarehe 4 Novemba 2026, pembezoni mwa mkutano huo, yakiongozwa na Bw. Emilian Nyanda kutoka Wizara ya Nishati, ambaye pia ni Mwakilishi wa Tanzania katika ISA lengo likiwa ni  kutafuta wawekezaji watakaoshirikiana na Serikali katika kupanua huduma ya umeme  hususan maeneo ambayo bado hayajafikiwa na Gridi ya Taifa

Katika mazungumzo hayo, Bw. Nyanda amesema Serikali inaendelea kuweka mazingira wezeshi ya kuvutia uwekezaji katika nishati jadidifu, hususan umeme wa jua, ili kuhakikisha wananchi wanapata huduma ya umeme wa uhakika, ikiwemo katika maeneo ya visiwa na maeneo mengine ambayo bado hayajafikiwa na Gridi ya Taifa, sambamba na kuimarisha shughuli za kiuchumi na kijamii.

Pembezoni mwa mkutano wa ISA, Bw.Nyanda amekutana na watendaji wa kampuni ya Shakti Pumps, wakiongozwa na Mtendaji Mkuu, Bw. Ramesh Patidar, ambaye ameeleza kuwa kampuni hiyo inajishughulisha na teknolojia ya pampu za maji zinazotumia nishati ya jua kwa ajili ya kusambaza maji katika jamii na kuendesha miradi ya umwagiliaji ambayo ni muhimu katika kuongeza tija ya kilimo na kuboresha upatikanaji wa maji, hususan maeneo ya vijijini.

Aidha, Bw. Nyanda amefanya mazungumzo na Mtendaji Mkuu wa Kampuni ya Enerzy AI, Bw. Mazhar Hussein, inayojishughulisha na mifumo ya kidijitali ya kusimamia na kudhibiti mitambo ya umeme wa jua. Mifumo hiyo ina uwezo wa kufuatilia utendaji wa mitambo, kubaini hitilafu na kutabiri mwenendo wa uzalishaji wa umeme kwa kuzingatia hali ya mionzi ya jua.

Katika hatua nyingine, amekutana na Mkuu wa Sehemu ya Biashara wa Kampuni ya Ecozen, Bw. Kishan Dhameliya, ambapo wamejadili matumizi ya nishati ya jua katika miradi ya umwagiliaji na mifumo ya kuhifadhi mazao kwa kutumia vyumba vya baridi vinavyoendeshwa kwa umeme wa jua.

Kampuni ya Ecozen tayari inatekeleza shughuli zake nchini Tanzania, ikiwemo ufungaji wa mifumo ya umwagiliaji inayotumia nishati ya jua katika mikoa ya Dodoma na Arusha.

 Kampuni hiyo pia inatoa teknolojia ya vyumba vya baridi vinavyowezesha wakulima, wafugaji na wafanyabiashara kuhifadhi mazao yao kwa muda mrefu zaidi, hivyo kupunguza upotevu wa mazao baada ya mavuno na kuongeza fursa za masoko.

Katika mazungumzo yake na kampuni hizo, Bw. Nyanda amesisitiza kuwa Tanzania inaendelea kuwakaribisha wawekezaji wenye teknolojia na uzoefu katika uzalishaji na matumizi ya nishati ya jua ili kushirikiana na Serikali katika kupanua huduma za umeme, kuongeza matumizi ya teknolojia safi na kuchochea maendeleo ya kiuchumi nchini.

WANANCHI MAKOLE MUHEZA WAMIMINIKA KUSHIRIKI UCHAGUZI MDOGO WA UDIWANI

Wananchi wa Makole Muheza wakiwa kwenye msururu kwa ajili ya  kushiriki uchaguzi mdogo wa udiwani

WAVAMIZI WA SHAMBA LA NDOROBO PANGANI KUONDOKA ,TAKUKURU KUCHUKUZA HATI ZA ARDHI

Na Mwandishi Wetu, Tanga

WAKAZI walioingia na kuanzisha makazi pamoja na shughuli mbalimbali ndani ya Shamba la Mivumoni, maarufu kama Ndorobo, wilayani Pangani, mkoani Tanga, wanatarajiwa kuondoka katika sehemu ya eneo hilo kufuatia hatua za Serikali za kurejesha matumizi ya shamba hilo.

Hatua hiyo imekuja baada ya mgogoro wa uvamizi wa shamba hilo lenye ukubwa wa hekta 5,320, ulioanza mwaka 2004, huku Serikali ikitangaza utaratibu wa kuwaondoa wakazi waliopo ndani ya eneo la hekta 4,079.

Mkuu wa Mkoa wa Tanga, Balozi Dkt. Batilda Burian, alitoa maelekezo hayo wakati wa ziara yake katika Kijiji cha Kigurusimba, ambako alikutana na wakazi wanaoishi na kufanya shughuli mbalimbali katika eneo hilo.

Amesema Wizara ya Mifugo, kupitia uongozi wa Shamba la Mivumoni chini ya VVBD/TVLA, imekubali kuachia hekta 1,271 zilizokuwa zimevamiwa ili zitumike kwa makazi na shughuli za wakazi watakaohamishwa kutoka maeneo mengine ya shamba hilo.

Kwa mujibu wa Dkt. Batilda, zoezi la kuwaondoa wakazi hao litafanyika kwa utaratibu maalumu, likianza Novemba 7, 2026, ambapo wataalamu wa upimaji na ardhi watatumia ndege nyuki kukusanya taarifa za eneo hilo, ikiwamo ukubwa wa ardhi na rasilimali zilizopo.

Amesema Novemba 9, mwaka huu, hatua nyingine itakuwa ni kuweka alama za X katika maeneo yatakayohusika na ubomoaji, kuweka mipaka na kuzuia uhamiaji pamoja na uendelezaji wowote mpya ndani ya eneo husika.

Akizungumzia hatua hiyo, Mwenyekiti wa Kijiji cha Kigurusimba, Syvestre Munga, amesema baadhi ya watu walioanzisha makazi ndani ya shamba hilo walipewa maeneo na viongozi wa kijiji kwa nyakati tofauti, wakiamini kuwa ardhi hizo zilikuwa nje ya mipaka ya shamba.

Wakati huohuo, Dkt. Batilda ameiagiza Halmashauri ya Wilaya ya Pangani kufuta hati miliki za kimila zilizotolewa kwa kampuni za Pangani Plantation Limited, Mamba Ranch Limited pamoja na baadhi ya watu binafsi, akieleza kuwa ardhi hizo zilitolewa kinyume cha sheria kwa kuwa zipo ndani ya eneo la shamba.

Aidha, ameiagiza Taasisi ya Kuzuia na Kupambana na Rushwa (TAKUKURU) Mkoa wa Tanga kuchunguza mchakato mzima uliowezesha kutolewa kwa ardhi hizo na hati miliki zake.

Kwa upande wake, Meneja wa VVBD/TVLA, Dkt. Oliva Manangwa, amesema uongozi wa taasisi hiyo uko tayari kushirikiana na Serikali katika kuhakikisha zoezi la kuwahamisha wakazi hao linafanyika kwa utaratibu na kuwapatia eneo mbadala lililopangwa.

Amesema eneo la hekta 1,271 halitawahusu wakazi wanaoishi ndani yake pekee, bali pia wale ambao makazi na shughuli zao zipo katika sehemu nyingine za shamba hilo.

Dkt. Manangwa amefafanua kuwa, baada ya wataalamu wa ardhi na upimaji kubaini ukubwa wa eneo utakaostahili kwa kila kaya, wakazi watakaobainika kumiliki maeneo yanayozidi kiwango kitakachowekwa watalazimika kupunguziwa ili kutoa nafasi kwa wengine.

Amesisitiza kuwa Shamba la Mivumoni lina umuhimu mkubwa kwa Taifa kutokana na matumizi yake katika shughuli za utafiti na majaribio mbalimbali yanayohusiana na sekta ya mifugo.

Amesema miongoni mwa shughuli zinazofanyika ni majaribio ya chanjo za mifugo zinazotengenezwa na Kituo cha Chanjo (TVI) kilichopo Kibaha, mkoani Pwani, pamoja na majaribio ya viatilifu kwa ajili ya usajili wake.

Pia, shamba hilo hutumika kama shamba darasa kwa wadau mbalimbali, wakiwamo wafugaji na wanafunzi wa fani ya mifugo, sambamba na kufanyika kwa tafiti zinazolenga kuendeleza sekta hiyo.

HISTORIA YA SHAMBA

Shamba la Mivumoni lilianzishwa mwaka 1965 na Wizara ya Kilimo kwa lengo la kufanya utafiti kuhusu mbung'o.

Kati ya mwaka 1970 na 1979, eneo hilo lilikabidhiwa kwa Kituo cha Utafiti wa Mifugo (LRC) kwa ajili ya kutunzia mifugo ya ziada iliyokuwa ikizalishwa kituoni hapo.

Kuanzia mwaka 1979 hadi 2003, shamba hilo lilitumika katika mradi wa uzalishaji wa mitamba kwa ajili ya maziwa.

Mwaka 2004, baada ya mradi huo kumalizika, lilikabidhiwa kwa Taasisi ya Utafiti wa Ndorobo (TTRI), ambayo kwa sasa inajulikana kama Kituo cha Utafiti wa Wadudu na Magonjwa Waenezayo, chini ya usimamizi wa Wakala wa Maabara ya Veterinari (TVLA).

RAIS DKT. SAMIA ASHIRIKI KUPIGA KURA UCHAGUZI MDOGO JIMBO LA CHAMWINO LEO

 Rais wa Jamhuri ya Muungano wa Tanzania, Mhe. Dkt. Samia Suluhu Hassan, leo Jumatano, Novemba 4, 2026, ameshiriki Uchaguzi Mdogo wa Ubunge wa Jimbo la Chamwino baada ya kupiga kura katika Kituo cha Kupigia Kura cha Ofisi ya Kijiji cha Chamwino, mkoani Dodoma.

Rais Samia alifika katika kituo hicho kushiriki zoezi la uchaguzi linalofanyika kwa ajili ya kumpata Mbunge mpya wa Jimbo la Chamwino, nafasi iliyokuwa wazi kufuatia aliyekuwa Mbunge wa jimbo hilo, Mhe. Deogratius Ndejembi, kuteuliwa kuwa Makamu wa Rais wa Jamhuri ya Muungano wa Tanzania.

Ushiriki wa Rais Samia katika zoezi hilo unaonesha umuhimu wa wananchi kutumia haki yao ya kikatiba ya kuchagua viongozi wanaowataka kuwawakilisha katika vyombo vya maamuzi.

Uchaguzi Mdogo wa Chamwino unawapa wapiga kura wa jimbo hilo fursa ya kuchagua mwakilishi mpya atakayechukua nafasi ya Ndejembi na kuendelea kusimamia masuala ya maendeleo pamoja na kuwakilisha wananchi wa Chamwino bungeni.

Ndejembi alikuwa Mbunge wa Jimbo la Chamwino kabla ya kuteuliwa kushika nafasi ya Makamu wa Rais, hatua iliyosababisha nafasi ya ubunge wa jimbo hilo kuwa wazi na hivyo kuhitajika kufanyika kwa Uchaguzi Mdogo.

Wananchi waliojiandikisha katika Daftari la Kudumu la Wapiga Kura wanashiriki katika uchaguzi huo kwa kutekeleza wajibu wao wa kuchagua kiongozi watakayempa dhamana ya kuwawakilisha kwa mujibu wa taratibu za uchaguzi.

Matokeo ya Uchaguzi Mdogo wa Jimbo la Chamwino yanatarajiwa kutoa Mbunge mpya ambaye atarithi nafasi hiyo na kuendeleza uwakilishi wa wananchi wa jimbo hilo katika Bunge la Jamhuri ya Muungano wa Tanzania.

Rais wa Jamhuri ya Muungano wa Tanzania, akipiga kura kwenye Kituo cha kupigia kura cha Ofisi ya Kijiji cha Chamwino mkoani Dodoma, tarehe 04 Novemba, 2026 katika Uchaguzi mdogo wa Ubunge wa Jimbo la Chamwino. Uchaguzi huo unafanyika kufuatia aliyekuwa Mbunge wa Jimbo hilo, Mhe. Deogratius Ndejembi kuteuliwa kuwa Makamu wa Rais wa Jamhuri ya Muungano wa Tanzania.

MAELFU WAJITOKEZA KATIKA VITUO MBALIMBALI KUSHIRIKI KUPIGA KURA KATA YA MWERA PANGANI

Maelfu wajitokeza katika Vituo mbalimbali kushiriki kupiga kura Wilayani Pangani Kata ya Mwera

WAZIRI SANGU AMPA POLE ASKOFU BEATUS URASSA KUFUATIA KIFO CHA PADRI GODRICK MUNDEWA

  

Na OWM (KAM), Sumbawanga

Waziri wa Nchi, Ofisi ya Waziri Mkuu - Kazi, Ajira na Mahusiano, Mhe. Deus Sangu, amemtembelea Askofu wa Jimbo Katoliki la Sumbawanga, Mhashamu Askofu Beatus Urassa (ALCP/OSS), na kumpa pole kufuatia kifo cha Padre Godrick Mundewa aliyefariki baada ya ajali iliyotokea Oktoba 30, 2026.

SERIKALI YAFUNGUA MILANGO YA UWEKEZAJI SEKTA YA NISHATI KWA MAKAMPUNI BINAFSI

Dodoma,

Naibu Waziri wa Nishati, Mhe. Salome  Makamba leo Novemba  3 , 2026 amekutana na kufanya mazungumzo na wawakilishi wa Kampuni ya FVIS SDN BHD kutoka Malaysia, kwa lengo la kujadili fursa za uwekezaji katika sekta ya nishati nchini.

Akizungumza katika kikao hicho, Mhe. Salome amesema Serikali ya Jamhuri ya Muungano wa Tanzania iko tayari kushirikiana na makampuni binafsi kutoka ndani na nje ya nchi katika kuwekeza na kuendeleza sekta ya nishati.

Amesisitiza kuwa Serikali imefungua milango kwa wawekezaji na ipo tayari kushirikiana na kampuni hiyo katika kuchochea uwekezaji kwenye sekta hiyo. 

Aidha, Serikali itaendelea kuratibu hatua zinazofuata kwa kushirikiana na Mamlaka ya Uwekezaji na Maeneo Maalum ya Kiuchumi Tanzania (TISEZA).

Katika hatua nyingine, Mhe. Salome ameeleza kuwa Serikali ina miradi mbalimbali ya kipaumbele katika maeneo ya uzalishaji na usafirishaji wa umeme ambayo tayari imefanyiwa upembuzi yakinifu (Feasibility Study) pamoja na tathmini ya athari za kimazingira na kijamii (ESIA), hatua inayolenga kuwezesha utekelezaji wa miradi hiyo kwa wakati.

Kikao hicho kimehudhuriwa na Kamishna wa Umeme na Nishati Jadidifu, Mhandisi Innocent Luoga; Meneja wa TISEZA Kanda ya Kati, Bi. Phina Lyimo, pamoja na maafisa wengine kutoka  Wizara ya Nishati.

HAYATI SAMUEL SITTA ALITUACHIA DIRA YA UONGOZI, TUIISHI - MAKAMU WA RAIS

Makamu wa Rais wa Jamhuri ya Muungano wa Tanzania, Mhe. Deogratius Ndejembi, amewataka Viongozi kuuenzi urithi wa aliyewahi kuwa Spika wa Bunge la Jamhuri ya Muungano wa Tanzania Hayati Samuel John Sitta kwa kuishi misingi ya uadilifu, uwajibikaji na kujenga Taasisi imara.

DKT.HOMERA ATEMBELEA UBALOZI WA TANZANIA UMOJA WA FALME ZA KIARABU (U.A.E)

Waziri wa Nishati, Mhe. Dkt. Juma Zuberi Homera ametembelea Ubalozi wa Jamhuri ya Muungano wa Tanzania, Umoja wa Falme za Kiarabu, Abu Dhabi (U.A.E) ambapo amesaini kitabu cha wageni, na kuzungumza na maafisa Ubalozi.

Ziara ya Dkt. Homera imefanyika pembezoni mwa Mkutano wa Nishati (ADIPEC) ulioanza Novemba 2 hadi 5, 2026, mkutano huo unawakutanisha wadau mbalimbali wa sekta ya nishati wakizungumzia masuala mbalimbali yanayoikumba sekta ya nishati ikiwemo usalama na mnyororo wa ugavi wa nishati pamoja na matumizi ya akili Unde (AI) kwenye sekta ya nishati.

Ambapo Tanzania kupitia Wizara ya Nishati imetumia jukwaa hilo la (ADIPEC 2026) kutangaza miradi mbalimbali iliyopo nchini ikiwepo miradi ya mafuta na gesi asilia na miradi ya umeme na nishati jadidifu na kuvutia uwekezaji katika sekta ya nishati.

Dkt. Homera amepokelewa na Mheshimiwa, Balozi. Lt. Jen. (Mst) Yacoub Hassan Mohamed na maafisa Ubalozi.

WAZIRI MKUU WA RWANDA AVUTIWA NA BIDHAA ZA WAJASILIAMALI WA TANZANIA

Na OWM (KAM), Kigali

Waziri Mkuu wa Rwanda, Dkt. Justin Nsengiyumva, ameonyesha kuvutiwa na ubora wa bidhaa zinazozalishwa na wajasiriamali wa Tanzania Bara na Zanzibar, baada ya kutembelea banda lao katika Maonyesho ya 26 ya Wajasiriamali Wadogo na wa Kati ya Jumuiya ya Afrika Mashariki maarufu kama Nguvu Kazi - Jua Kali.

SEKTA YA NISHATI KUCHOCHEA UWEKEZAJI NA UKUAJI WA VIWANDA NCHINI-DKT.HOMERA

Abu Dhabi, UAE

Waziri wa Nishati, Mhe. Dkt. Juma Zuberi Homera, amesema Tanzania inaendelea kujipanga kimkakati kuitumia sekta ya nishati kama kichocheo cha ukuaji wa uchumi, kuongeza ushindani wa ukuaji wa viwanda na kuvutia uwekezaji, ikiwa ni sehemu ya juhudi za kuimarisha mageuzi ya kiuchumi nchini.

Dkt. Homera ameyasema hayo wakati akizungumza katika kikao cha Mawaziri wa Nishati kilichofanyika wakati wa Mkutano wa Kimataifa wa Nishati (ADIPEC 2026), unaofanyika Abu Dhabi, Umoja wa Falme za Kiarabu (UAE).

Amesema Serikali inalenga kuibadilisha sekta ya nishati kutoka katika utoaji wa huduma za kawaida za umeme na gesi na kuifanya kuwa nyenzo muhimu ya kimkakati katika kukuza uzalishaji wa viwanda, ikiwemo viwanda vya mbolea, kupunguza gharama za uzalishaji na kuongeza mvuto wa Tanzania kwa wawekezaji wa ndani na nje ya nchi.

Akizungumzia hatua zilizofikiwa katika kuongeza uzalishaji wa umeme, Dkt. Homera amesema kukamilika kwa Mradi wa Kufua Umeme wa Julius Nyerere (JNHPP) wenye uwezo wa kuzalisha MW 2,115 kumeongeza uwezo wa uzalishaji wa umeme nchini kufikia MW 4,646, ikilinganishwa na mahitaji ya juu ya MW 2,271.

Amesema hali hiyo imeiwezesha Tanzania kuwa na ziada ya umeme wa MW 2,375, hatua inayofungua fursa zaidi za uwekezaji katika viwanda vinavyohitaji matumizi makubwa ya umeme.

Aidha, ameongezea kuwa Serikali inaendelea kupanua miundombinu ya usafirishaji umeme ya msongo wa kilovoti 400 (400kV) ili kuimarisha upatikanaji wa nishati ya uhakika katika maeneo ya shughuli za uchimbaji madini na miundombinu mikubwa ya kimkakati, ikiwemo Reli ya Kisasa (SGR).

Akielezea malengo ya muda mrefu ya Serikali, Dkt. Homera amesema Tanzania inalenga kuongeza uwezo wa uzalishaji umeme kufikia MW 8,000 ifikapo mwaka 2030 na MW 15,000 ifikapo mwaka 2031, huku ikilenga kuhakikisha asilimia 75 ya umeme unaozalishwa unatokana na vyanzo safi vya nishati, ikiwemo gesi asilia na maji.

Amesisitiza kuwa Serikali inaendelea kuwekeza katika vyanzo vya nishati jadidifu ili kuongeza wigo wa uzalishaji na kuimarisha usalama wa nishati nchini. Miradi hiyo ni pamoja na Mradi wa Umeme wa Jua Kishapu wenye uwezo wa MW 100, pamoja na miradi ya umeme wa upepo inayopangwa kutekelezwa katika maeneo ya Manyoni na Nzega.

Vilevile, amesema Tanzania inaendelea na mipango ya kuendeleza miradi ya jotoardhi yenye lengo la kufikia MW 5,000, ambapo MW 30 zinatarajiwa kuanza kuzalishwa mwaka wa fedha 2026/27 na kuongeza uwezo huo kufikia MW 130 ifikapo mwaka 2030.

Amesisitiza kuwa uwekezaji katika vyanzo mbalimbali vya nishati na upanuzi wa miundombinu yake ni sehemu ya mkakati wa Serikali wa kuhakikisha nishati ya uhakika, nafuu na endelevu inapatikana kwa ajili ya kuchochea shughuli za uzalishaji, ukuaji wa viwanda na maendeleo ya uchumi wa Taifa.

ADIPEC ni mkutano na maonesho ya kimataifa ya nishati ambapo mwaka huu imezikutanisha nchi zaidi ya 30, makampuni zaidi ya 2,250 ambapo viongozi wa nishati wanajadili mambo mbalimbali ikiwemo uhakika na usalama wa nishati haswa kutokana na athari za kisiasa mashariki ya kati, pia matumizi ya akili Unde (AI) katika sekta ya nishati ni mada kuu zinazotawala jukwaa hilo.

WAPIGA KURA 213,024 WATARAJIA KUSHIRIKI UCHAGUZI MDOGO CHAMWINO NA KATA 11

Jumla ya wapiga kura 213,024 walioandikishwa katika Daftari la Kudumu la Wapiga Kura, wanatarajiwa kushiriki kwenye Uchaguzi Mdogo wa Ubunge katika Jimbo la Chamwino, Mkoa wa Dodoma na Udiwani katika Kata 11 za Tanzania Bara kesho tarehe 04 Novemba, 2026.

BARAZA LA WAFANYAKAZI TEA LAPITIA MPANGO MKAKATI WA TANO

MOROGORO

Wajumbe wa Baraza la Wafanyakazi la Mamlaka ya Elimu Tanzania (TEA) wamepitia na kujadili Mpango Mkakati wa Tano wa Mamlaka hiyo (2026/27–2030/31), pamoja na kutathmini utekelezaji wa Mpango Mkakati wa Nne (2021/22–2025/26).

TANROADS SONGWE YAFUNGUA SEHEMU YA BARABARA YA FORODHA TUNDUMA, YATEKELEZA MAELEKEZO YA MAKAMU WA RAIS

Wakala ya Barabara Tanzania (TANROADS) Mkoa wa Songwe imefungua sehemu ya barabara ya Forodha (OSBP) Tunduma yenye urefu wa mita 400, ikiwa ni utekelezaji wa maelekezo ya Makamu wa Rais wa Jamhuri ya Muungano wa Tanzania, Mhe. Deogratius Ndejembi, aliyetoa wakati wa ziara yake mkoani humo, akitaka kasi ya ujenzi wa mradi huo iongezwe.

TANZANIA YATUMIA MKUTANO MKUU WA ISA INDIA KUVUTIA UWEKEZAJI WA NISHATI JUA KUFIKIA MALENGO YA DIRA 2050

📌*Hatua zinazochukuliwa na Serikali kupunguza gharama za awali za uwekezaji zaelezwa*

New Delhi, India

Tanzania imetumia Mkutano Mkuu wa Tisa  wa  Muungano wa Kimataifa wa Nishati ya Jua (International Solar Alliance – ISA) unaofanyika nchini India, kueleza maeneo yanayohitaji ushirikiano katika uendelezaji wa nishati jua ikiwa ni sehemu ya mkakati wa kuongeza uzalishaji wa umeme na kufikia malengo ya Dira ya Taifa ya Maendeleo 2050.

Akizungumza tarehe 03 Novemba 2026 katika Mkutano huo unaohusisha nchi wanachama na Washirika wa Maendeleo  zaidi ya 125, Mwakilishi wa Tanzania katika ISA, Bw.Emilian Nyanda kutoka Wizara ya Nishati amesema Serikali imeweka mkazo katika kuendeleza nishati jadidifu, hususan nishati ya jua, ili kuongeza upatikanaji wa umeme wa uhakika, kuchochea shughuli za kiuchumi na kukabiliana na athari za mabadiliko ya tabianchi.

Ameeleza kuwa, kupitia Dira ya Taifa ya Maendeleo 2050, Tanzania inalenga kuongeza uwezo wa uzalishaji wa umeme kutoka gigawati 4.6 za sasa hadi gigawati 8 ifikapo mwaka 2030 na gigawati 70 mwaka 2050, huku nishati ya jua ikitarajiwa kuwa miongoni mwa vyanzo muhimu vya kufanikisha malengo hayo.

Katika hatua nyingine amesema Tanzania inapiga hatua katika uzalishaji wa umeme wa jua kupitia miradi mbalimbali ikiwemo mradi wa Kishapu mkoani Shinyanga wenye uwezo wa kuzalisha megawati 150, ambapo awamu ya kwanza ya megawati 50 imekamilika na awamu ya pili ya megawati 100 ipo katika hatua za utekelezaji. 

Ameongeza kuwa,kwa sasa megawati 100 za umeme jua zinaingia katika gridi ya Taifa huku Serikali ikilenga kuongeza  megawati 1,000 za umeme huo wa jua ifikapo mwaka 2035 kupitia uwekezaji wa sekta ya umma na binafsi.

Amesema Wizara ya Nishati kwa kushirkiana na TANESCO imeendelea na jitihada za kutambua na kutenga maeneo maalumu kwa ajili ya uwekezaji wa miradi ya nishati ya jua, kufanya tafiti za upembuzi yakinifu na tathmini za athari kwa mazingira, hatua inayolenga kupunguza gharama za awali za uwekezaji na kuvutia wawekezaji zaidi nchini.

Kuhusu usambazaji wa umeme jua, amesema, pamoja na kuongeza  mchango wake kwenye gridi ya taifa, Tanzania inaendelea kutumia teknolojia ya nishati hiyo kufikisha huduma katika maeneo ambayo hayajafikiwa na Gridi ya Taifa, ikiwemo visiwa vilivyopo katika maziwa makuu na Bahari ya Hindi.

Nishati hiyo pia inatumika katika shughuli za uzalishaji mali zikiwemo kilimo, umwagiliaji, usindikaji wa mazao, uvuvi, ufugaji na usambazaji wa maji.

Bw. Nyanda amepongeza ushirikiano uliopo kati ya Tanzania na ISA ambao umewezesha kuanzishwa kwa Kituo cha  Umahiri cha Mafunzo ya Teknolojia ya Nishati ya Jua (Solar Technology Application Centre - STAR-C) katika Chuo cha Ufundi Arusha (ATC), kinachotoa mafunzo kwa wataalamu wa ndani, huku Watanzania wengine wakinufaika na mafunzo ya kitaalamu katika taasisi mbalimbali za kimataifa.

Amesisitiza kuwa Tanzania itaendelea kushirikiana na nchi wanachama wa ISA, sekta binafsi na washirika wa maendeleo katika kuvutia mitaji, teknolojia na utaalamu ili kuharakisha utekelezaji wa miradi ya nishati jadidifu na kufanikisha azma ya Serikali ya kujenga uchumi imara na endelevu kupitia Dira ya Taifa ya Maendeleo 2050.

Mkutano huo umefunguliwa leo na Waziri anayeshughulikia masuala ya Nishati Jadidifu wa India, Shri Pralhad Joshi ambaye ndiye anayeongoza Mkutano Mkuu wa 9 wa ISA.

Katika hotuba yake ya ufunguzi Bw. Joshi  amesisitiza umuhimu wa mataifa yote kushirikiana ili kufanya nishati ya jua ipatikane kwa bei nafuu duniani kote, pia ametoa wito wa kuongeza uwekezaji kwenye nishati safi, hasa katika nchi zinazoendelea, ili kukabiliana na mabadiliko ya tabianchi na kukuza maendeleo endelevu.