*📌Lengo ni kufahamu changamoto za uzalishaji, usambazaji na upatikanaji wa Teknolojia ya Nishati safi.*
*📌Wadau ni chombo muhimu ili kufika 80% ifikapo 2034.*
*📍Dar es Salaam.*
Wizara ya Nishati kupitia kitengo cha Nishati Safi ya Kupikia, Imekutana na wadau mbalimbali wa uzalishaji usambazaji wa Teknolojia za nishati safi ya kupikia Jijini Dar es Salaam ili kufahamu changamoto za uzalishaji upatikanaji na usambazaji wa teknolojia ya nishati safi ya kupikia.
Lengo la mkutano huo ni kupata mapendekezo kutoka kwa wadau hao ya namna bora Serikali chini ya Wizara ya Nishati itaweza kuwasaidia wadau hao ili kufikia lengo la matumizi ya Nishati safi ya kupikia la asilimia 80 ifikapo 2034 kwa watanzania.
Katika Ufunguzi wa kikao kazi hicho na wadau hao Mkuregenzi Kitengo cha Nishati safi ya Kupikia Bw. Nolasco Mlay amesema lengo mojawapo katika malengo mahsusi ya Mkakati wa Taifa wa Matumizi ya Nishati Safi ya Kupikia ni Kuimarisha upatikanaji wa malighafi na miundombinu ya uhakika ya nishati safi ya kupikia.
“tunafahamu kuwa lengo hili haliwezi kufanikishwa na Serikali pekee bila kuhusisha Sekta binafsi ambayo ndio mdau muhimu katika kuhakikisha kuwa uwekezaji kupitia uzalishaji na usambazaji wa nishati safi ya kupikia unaakisi mahitaji ya wananchi.”Alisema Mlay
Kulingana na takwimu zilizozinduliwa na Tume ya Taifa ya Takwimu (NBS) Novemba 2025 zinaonesha ongezeko la matumizi ya nishati safi nchini limefikia asilimia 23.2%, hivyo kutokana na ongezeko hilo Wizara chini ya kitengo cha Nishati safi imeona ipo haja ya kukutana na wadau ili kuona namna serikali itashirikiana na wadau kukidhi ongezeko hilo.
Ni dhahiri kuwa ongezeko hili la mahitaji linapaswa kwenda sambamba na upatikanaji,uzalishaji na usambazaji wa nishati hizi ili kuwa na usawa katika mnyororo wa thamani wa nishati safi ya kupikia.
“Suala la Nishati safi ya kupikia ni suala mtambuka na kila mmoja anapaswa kushiriki na kushirikishwa ili kufikia lengo ambapo amewapongeza wadau mbalimbali kwa michango yao katika jitihada za kuhakikisha nishati safi ya kupikia inamfikia kila mtanzania na michango yao katika kujenga Taifa lenye tija, afya bora mazingira salama na uchumi jumuishi.
Naye mmoja wa wadau na msambazaji wa Teknolojia ya Nishati safi (Kuni Smart) kutoka Jijini Mwanza Bw. Bernard Makachia amesema kwamba kikao kazi hiki kilichoandaliwa na Wizara ya nishati kimekuja kwa wakati muafaka na kitasaidia wadau mbalimbali wanaojihusisha na Teknolojia Nishati safi mchini kuweza kuwasilisha changamoto zao ili kufikia lengo la kitaifa kukiwa na matumaini makubwa kwamba zitafanyiwa kazi kwa wakati na kuongeza kuwa Sekta binafsi ni mdau mkubwa wa Nishati Safi hivyo akishiriikiana na serikali lengo la asilimia 80 litatimia ifikapo 2034.
Kikao kazi hicho na wadau mbalimbali wa nishati safi kimefanyika kwa siku mbili kikiwakutanisha wadau kutoka Mashirika yasiyokuwa ya kiserikali, Taasisi na Wizara za Kiserikali, Mashirika na Taasisi binafsi, Asasi za kiraia, Taasisi za Kifedha na wadau binafsi.
Share this
EmoticonEmoticon