STAMICO YAFUNGAMANISHA SEKTA YA MADINI NA UKUAJI WA UCHUMI NCHINI

- Yazindua Kiwanda, chenye uwezo wa kuzalisha tani 28 kwa saa

DKT.MWIGULU :ZAIDI YA SH.BILIONI 330 ZAINGIA MFUKO WA BARABARA NDANI YA MWEZI MMOJA

*_▪︎ Akemea watoto chini ya miaka mitano kutozwa fedha za matibabu_*

WAZIRI MKUU, Dkt. Mwigulu Nchemba, amesema zaidi ya shilingi bilioni 330 zimeingia kwenye Mfuko wa Barabara ndani ya mwezi mmoja baada ya Serikali kuanza kuelekeza fedha moja kwa moja kwenye mfuko huo ili kuharakisha ujenzi na ukarabati wa barabara nchini.

“Sasa hivi tangia tupitishe bajeti, nimeshuhudia ndani ya mwezi mmoja zaidi ya bilioni 330 zimekwenda kwenye mfuko,” alisema Waziri Mkuu leo (Jumamosi, Novemba 7, 2026) wakati akizungumza na wananchi katika viwanja vya Stendi ya Mwanhuzi, kijiji cha Bomani, wilayani Meatu, mkoani Simiyu.

Alisema Serikali imeweka vipaumbele vitatu katika matumizi ya fedha hizo. Vipaumbele hivyo ni kukarabati barabara muhimu kwa shughuli za kiuchumi, kuwarejesha kazini wakandarasi walioondoka kwa kukosa malipo na kutoa malipo ya awali kwa wakandarasi wanaosubiri kuanza ujenzi.

Akizungumzia huduma za afya, Dkt. Mwigulu alikemea vitendo vya kuwatoza watoto walio chini ya miaka mitano fedha za matibabu. “Miongozo iko wazi, watoto walio chini ya miaka mitano matibabu yake bure. Mnawatoza fedha ya nini?” alihoji.

Aliwataka watumishi wa afya kuwahudumia mara moja wajawazito wanaofika hospitalini wakiwa na uchungu. Pia, alikemea tabia ya kuzitaka familia za wagonjwa wa dharura kuchangisha fedha za mafuta kabla ya kuwapeleka wagonjwa hao kwenye hospitali za rufaa.

Kuhusu barabara ya Nkoma–Lalago yenye urefu wa kilomita 65, Waziri Mkuu alisema mkandarasi atapatiwa malipo ya awali ili aanze ujenzi kwa kiwango cha lami. Aidha, alimtaka Waziri wa Ujenzi, Masanja Kungu Kadogosa, kuharakisha usanifu wa barabara inayounganisha Simiyu na Singida kupitia Meatu na Iramba Mashariki ili iingizwe kwenye bajeti ya mwaka ujao wa fedha.

Akijibu hoja ya Mbunge wa Meatu, Salum Khamis Salum, kuhusu uhaba wa maji, Waziri Mkuu aliwataka viongozi wa wilaya washirikiane na wananchi na wataalamu kutathmini pendekezo la kujenga bwawa kwenye Mto Mwanhuzi. Alisema iwapo wataalamu watapendekeza kutumia eneo la bwawa la zamani, viongozi waheshimu uamuzi wa mahakama na wajadiliane kuhusu fidia na wananchi walioshinda kesi.

Kwa upande wa wafugaji, Dkt. Mwigulu alisema Serikali itawalipa fidia wafugaji walioshinda kesi za mifugo na kukuta mifugo yao imekufa walipokwenda kuichukua. Alisema deni la fidia hizo ni takribani shilingi bilioni 3.8.

Awali, Naibu Waziri wa Maji, Mhandisi Kundo Andrea Mathew, alisema mji wa Mwanhuzi unahitaji lita milioni 3.8 za maji kwa siku, lakini unazalisha lita milioni 1.7. Alisema maji yamepungua katika Bwawa la Mwanyahina linalohudumia mji huo na visima vitano vilivyochimbwa havikutoa maji ya kutosha kusambazwa kwa wananchi.

DC MNZAVA ATOA WITO WA KUPUNGUZA SUKARI,CHUMVI NA MAFUTA

 

Na Ashrack Miraji, Moshi

Mkuu wa Wilaya ya Moshi, Godfrey Mnzava, amewataka wananchi kuzingatia ulaji wa vyakula vya asili na kupunguza matumizi ya sukari, chumvi na mafuta mengi ili kujikinga na magonjwa yasiyoambukiza, yakiwamo kisukari na shinikizo la damu.

Mnzava ametoa wito huo Novemba 6, 2026, wakati wa kilele cha Maadhimisho ya Siku ya Lishe Kitaifa yaliyofanyika katika Hospitali ya St. Joseph, Manispaa ya Moshi, akisisitiza kuwa ulaji bora ni msingi wa afya njema kwa mtu mmoja mmoja, familia na jamii kwa ujumla.

Amesema kaulimbiu ya maadhimisho ya mwaka huu isemayo “Imarisha Afya: Kula Kiasili, Punguza Sukari, Chumvi na Mafuta” inalenga kuhamasisha wananchi kufanya maamuzi sahihi kuhusu vyakula wanavyotumia kila siku ili kupunguza hatari ya kupata magonjwa yasiyoambukiza.

Ameeleza kuwa takwimu za Halmashauri zinaonesha ongezeko la wagonjwa wa shinikizo la damu na kisukari kwa kipindi cha miaka mitatu mfululizo, hali inayohusishwa kwa kiasi kikubwa na ulaji usiofaa, matumizi ya vyakula vilivyosindikwa na vyenye sukari, chumvi na mafuta kwa wingi, pamoja na kutofanya mazoezi.

Kutokana na hali hiyo, amewataka wananchi kuzingatia mlo kamili unaojumuisha mboga za majani, matunda, nafaka, kunde na vyakula vyenye protini, huku akisisitiza umuhimu wa kufanya mazoezi mara kwa mara na kupima afya ili kubaini magonjwa mapema na kupata matibabu kwa wakati.

Aidha, amewataka wataalamu wa afya na lishe kuendelea kutoa elimu kwa wananchi kwa lugha rahisi na kutumia mifano ya vyakula vinavyopatikana katika mazingira yao ili kuhakikisha elimu hiyo inafanyiwa kazi katika ngazi ya familia na jamii.<

TANESCO YAJENGA NJIA MBADALA YA UMEME KUPUNGUZA CHANGAMOTO YA UMEME MBAGALA,KIGAMBONI,MKURANGA NA KIBITI

📌Ni katika kuboresha hali ya upatikanaji umeme kwenye maeneo yaliyoathirika 

📌MD Twange awashukuru wateja na kuahidi kuhakikisha huduma inarejea katika hali ya kawaida

Shirika la Umeme Tanzania (TANESCO) limefanikisha kwa haraka ujenzi wa njia nyingine ya muda ya kusafirisha umeme ya juu (overhead) ikiwa ni  juhudi za kuboresha upatikanaji wa huduma ya umeme kwa wateja wa maeneo ya Mbagala, Kigamboni, Mkuranga na Kibiti, waliokumbwa na changamoto iliyojitokeza kwenye njia ya kusafirisha umeme chini ya ardhi yenye msongo wa kilovoti 132 (132kV) katika eneo la Gongolamboto.

Hatua hiyo imekuja baada ya wataalamu wa TANESCO kubuni na kuanza kutekeleza njia hyo mbadala ya muda wa kusafirisha umeme kwa njia ya juu, unaovuka eneo la miundombinu ya Reli ya Kisasa (SGR), ili kufidia sehemu ya njia ya chini ya ardhi iliyopata hitilafu na kuhakikisha wateja wanaendelea kupata huduma ya umeme wakati matengenezo yakiendelea.

Akizungumza leo, tarehe 7 Novemba 2026, wakati wa akikagua maendeleo ya kazi za matengenezo hayo, Mkurugenzi Mtendaji wa TANESCO, Bw. Lazaro Twange, amepongeza jitihada za wataalamu wa Shirika kwa kujenga kwa haraka na kutekeleza suluhisho hilo la dharura ili kupunguza changamoto kwa wateja walioathirika.

Amesema TANESCO inaendelea kuchukua hatua za kiufundi kuhakikisha huduma ya umeme inapatikana kwa wateja wakati wote, huku kazi za kurekebisha miundombinu iliyoharibika zikiendelea.

“Tumefika hapa kukagua maendeleo ya kazi na kujionea hatua zinazochukuliwa na wataalamu wetu. Tumefarijika kuona kuwa wameweza kutengeneza njia nyingine mbadala ya juu inayovuka eneo la SGR ili kuhakikisha umeme unaendelea kusafirishwa na kuwafikia wateja wetu wakati matengenezo ya njia ya ardhini yakiendelea. Tunawahakikishia wateja wetu kuwa tunaendelea kufanya kila linalowezekana kuhakikisha wanapata huduma ya umeme,” amesema Bw. Twange.

Aidha, amesisitiza kuwa TANESCO inaendelea kuimarisha miundombinu yake na kutafuta suluhisho zinazopunguza athari kwa wateja pale changamoto za kiufundi zinapojitokeza, akibainisha kuwa kuridhika kwa wateja na upatikanaji wa huduma ya uhakika ni kipaumbele cha Shirika.

Kwa upande wake, wataalamu wa TANESCO wameendelea na hatua za kuunganisha na kukamilisha mfumo huo mbadala, kazi inayohitaji tahadhari na kufanyika kwa kuzingatia taratibu za usalama ili kuhakikisha njia hiyo inakuwa tayari kutumika kwa ufanisi.

Hitilafu hiyo ilianza kujitokeza Novemba 3, 2026, katika njia ya kusafirisha umeme ya msongo wa kilovoti 132 inayounganisha Kituo cha Kupokea na Kupoza Umeme cha Gongolamboto na vituo vya Mbagala na Dege, Kigamboni.Ambapo Changamoto hiyo iliathiri upatikanaji wa umeme katika baadhi ya maeneo ya Mbagala, Kigamboni, Mkuranga na Kibiti kutokana na njia mbadala iliyokuwepo awali kuwa na uwezo mdogo wa kubeba mahitaji yote ya umeme kwa wakati mmoja.

TANESCO inaendelea na juhudi za kurekebisha miundombinu hiyo kwa lengo la kurejesha hali ya kawaida na kuimarisha uhakika wa huduma ya umeme kwa wateja wake.

PSSSF YAENDESHA SEMINA KWA MAAFISA UTUMISHI MARA

Mkuu wa Mkoa wa Mara, Brigedia Jenerali Evans Mtambi, akifungua semina ya mafunzo kwa Maafisa Rasilimaliwatu na Utumishi wa Mkoa huo iliyoandaliwa na Mfuko wa Hifadhi ya Jamii kwa Watumishi wa Umma (PSSSF) Mjini Musoma Novemba 6, 2026.

Mkuu wa Mkoa wa Mara, Brigedia Jenerali Evans Mtambi, akifungua semina ya mafunzo kwa Maafisa Rasilimaliwatu na Utumishi wa Mkoa huo iliyoandaliwa na Mfuko wa Hifadhi ya Jamii kwa Watumishi wa Umma (PSSSF) Mjini Musoma Novemba 6, 2026.

Meneja wa Mfuko wa PSSSF Kanda ya Ziwa Mashariki, Bw. Rajabu Kinande (kulia), akizungumza kwenye semina ya mafunzo kwa Maafisa Rasilimaliwatu na Utawala wa Mkoa wa Mara. Semina hiyo imefunguliwa na Mkuu wa Mkoa wa Mara Mhe. Brigedia Jenerali Evans Mtambi mjini Musoma, Novemba 6, 2026.

Mkuu wa Wilaya ya Musoma, Mhe. Juma Chikoka, akitoa salamu kwenye semina kwa Maafisa Utumishi mkoani Mara. Semina hiyo iliandaliwa na PSSSF na kufanyika Mjini Musoma Novemba 6, 2026

Baadhi ya washiriki wa semina ya mafunzo kwa Maafisa Rasilimaliwatu na Utawala wakifiatilia mada zilizokuwa zikiwasilishwa na wataalamu wa Mfuko wa PSSSF mjini Musoma Novemba 6, 2026.

Novemba 6, 2026 Musoma.

Mfuko wa Hifadhi ya Jamii kwa Watumishi wa Umma (PSSSF) umeendesha semina kwa Maafisa Utumishi Mkoa wa Mara, ili kuwajengea uelewa wa kushughulikia kwa weledi masuala ya wanachama wa mfuko huo.

Semina hiyo imefanyika Ijumaa Novemba 06, 2026 katika Wilaya ya Musoma, Mkoani Mara ambapo washiriki wa semina hiyo wamehimizwa kuwasaidia wanachama wa PSSSF kupata huduma bora na kwa wakati.

Akifungua semina hiyo, Mkuu wa Mkoa wa Mara Brigedia Jenerali Evans A. Mtambi amesema semina hiyo pia itasaidia kuongeza ufanisi katika upatikanaji wa huduma za PSSSF hususani matumizi ya huduma za kidigitali kwa wanachama.

“Zamani mtu alikuwa anafunga safari kwenda Dar es salaam, Dodoma au makao makuu ya Mkoa, lakini sasa hivi anawasha tu bando kwenye simu yake, anawasilisha hitaji lake na anahudumiwa akiwa nyumbani” amesema RC Mtambi.

Naye Meneja wa PSSSF Kanda ya Ziwa Mashariki, CPA. Rajabu Kinande amesema ili kuhakikisha Mfuko huo unatoa huduma bora na ya haraka, umejikita kuwafikia wanachama wake kwa njia ya kidigitali.

“Sasa hivi mteja anaweza kupata huduma kupitia simu yake ya mkononi hivyo ili kuhakikisha huduma hiyo inaenda vizuri tukaona ni vyema

kukutana na maafisa Utumishi  ambao wana wajibu wa kutusaidia kutoa huduma bora kwa wanachama” amesema CPA. Kinande.

Akitoa shukurani kwa niaba ya Maafisa Utumishi mkoani Mara, Jumanne Obogo ambaye ni Afisa Utumishi Halmashauri ya Musoma Vijijini amesema semina hiyo itawasaidia kuwahudumia kwa ufanisi watumishi kupitia mfumo wa kidigitali.

PROF.MBARAWA NA WAZIRI WA FEDHA WAUNGANA KUONGEZA KASI YA UJENZI WA SGR

WAZIRI wa Uchukuzi, Profesa Makame Mbarawa, amemshirikisha Waziri wa Fedha, Balozi Khamis Mussa Omari, katika ziara ya kukagua maendeleo ya ujenzi wa Reli ya Kisasa (SGR), Lot 4, eneo la Bukene mkoani Tabora, ili kujadili namna ya kuongeza kasi ya utekelezaji wa mradi huo.

Akizungumza wakati wa ziara hiyo, Profesa Mbarawa amesema ni jukumu la Serikali kuhakikisha fedha zinapatikana na kuwafikia walengwa kwa wakati, wakiwemo wakandarasi wadogo (Sub-contractors), ili kuwezesha kazi kuendelea bila vikwazo.

Amesema Serikali iliwaelekeza wakandarasi wakuu kutafuta wakandarasi wadogo kwa lengo la kuongeza nguvu kazi na kuharakisha utekelezaji wa mradi, ambapo ameeleza kuwa wakandarasi hao wameanza kufanya kazi zinazoonekana licha ya kuingia katika mradi huo kwa muda mfupi.

Ameongeza kuwa kwa sasa Shirika la Reli Tanzania (TRC) ndilo linalogharamia kazi zinazofanywa na wakandarasi wadogo, huku Serikali ikitarajia kukutana na kujadiliana namna ya kurejesha fedha hizo bila kuathiri mwendelezo wa utekelezaji wa mradi.

Kwa upande wake, Waziri wa Fedha, Balozi Khamis Mussa Omari, amesema suala la fedha si kikwazo katika utekelezaji wa mradi huo, akisisitiza kuwa Serikali iko tayari kuhakikisha fedha zinapatikana kwa wakati ili kuongeza kasi ya ujenzi.

Amesema Serikali itafuatilia kwa karibu maendeleo ya mradi huo ili kuhakikisha hauchelewi na hivyo kuchelewesha maendeleo yanayotarajiwa kuwanufaisha Watanzania.

Aidha, amesisitiza umuhimu wa kuboresha mazingira ya kazi ili kuongeza ufanisi kwa wakandarasi na kuwezesha utekelezaji wa majukumu yao kwa wakati.

Balozi Omari amewapongeza wakandarasi wadogo kwa kazi waliyoifanya ndani ya miezi miwili, akieleza kuwa maendeleo yao yanaonekana na yanatoa matumaini ya kuongezeka kwa kasi ya utekelezaji wa mradi huo.

Profesa Mbarawa amesema Lot 4 ya mradi wa SGR unaoanzia Tabora ina thamani ya dola za Marekani milioni 900, sawa na takribani Sh trilioni tatu.

ALMES INTERNATION SCHOOL DODOMA YALENGA KUJENGA MSINGI WA VIONGOZI BORA WA KESHO

 

   Na Meleka Kulwa – Mzalendo blog- DODOMA

ALMES International School ya Dodoma imesisitiza umuhimu wa elimu bora, malezi yenye maadili na ushirikiano wa karibu kati ya shule na wazazi katika kumwandaa mtoto kuwa kiongozi bora wa baadaye, mwenye uwezo wa kukabiliana na changamoto za kijamii na kiuchumi.

Msisitizo huo umetolewa wakati wa mahafali ya nne ya shule hiyo yaliyofanyika, jijini Dodoma, yakihusisha wanafunzi wa Pre-Unit na Grade Seven, ambao wamehitimu hatua mbalimbali za elimu na kuelekea katika hatua nyingine za masomo.

Mmiliki wa Almes International School, Weja Ng’olo, amesema shule hiyo imeendelea kuwekeza katika elimu na malezi bora, kwa kuzingatia maadili, kumfundisha mtoto kumkumbuka Mungu, usafi na kuwa na mazingira bora ya kujifunzia, akibainisha kuwa elimu inapaswa kwenda sambamba na maandalizi ya maisha.

Amesema shule hiyo inaendelea kujipanga kwa kuhakikisha inaboresha huduma zake mara kwa mara, huku ikiongeza programu za ziada zinazolenga kukuza vipaji, ujuzi na uwezo wa wanafunzi katika maeneo mbalimbali.

“Tunawashukuru sana wazazi kwa kutuamini na kutuletea watoto wao. Wazazi ni mabalozi wetu wakubwa, kwa sababu mzazi anapomweleza mzazi mwingine kuhusu huduma anazoziona kwa mtoto wake, hiyo ndiyo njia nzuri ya kuitangaza shule,” amesema Ng’olo.

Aidha amesema shule hiyo inaendelea kuboresha miundombinu, kuongeza huduma za elimu na kuimarisha programu za malezi ili kuwapatia wanafunzi elimu bora inayokidhi mahitaji ya sasa na ya baadaye.

Ng’olo amesema shule binafsi zina nafasi kubwa katika kusaidia Serikali kutoa elimu bora kwa wananchi, huku akieleza kuwa uwekezaji wa ndani katika sekta hiyo unaweza kuongeza fursa za elimu na kuwawezesha watoto wa Tanzania kushindana katika soko la elimu na ajira ndani ya Afrika Mashariki na maeneo mengine.

Hata hivyo amesema kuwa  Almes ina mpango wa kuimarisha elimu ya vitendo na shughuli za ziada, ikiwamo michezo, ushonaji, muziki, kukare na Teknolojia ya Habari na Mawasiliano (ICT), huku ikiendelea kuboresha maabara ya kompyuta na kuangalia namna ya kujumuisha teknolojia ya akili bandia (AI) katika mafunzo.

Katika hatua nyingine, amesema shule hiyo imeanzisha programu maalumu ya kuwahudumia watoto wakati wa likizo, inayolenga kuwasaidia wazazi wanaokuwa na majukumu ya kikazi huku watoto wao wakiendelea kujifunza na kushiriki shughuli mbalimbali za maendeleo ya kimwili, kiakili na kijamii.

Amesema programu hiyo itaanza Novemba 16 hadi Desemba 16, ambapo watoto watashiriki mazoezi ya jumla, michezo ya soka, kikapu, voliboli na tenisi, pamoja na shughuli za kompyuta, muziki, kukare na nyinginezo. Ada ya programu hiyo ni Sh200,000 kwa mwezi kwa wanafunzi wa Almes na Sh250,000 kwa watoto kutoka shule nyingine.

Ng’olo amesema programu hiyo inawalenga watoto wote bila kujali shule wanazosoma, akibainisha kuwa ni fursa ya kuwapatia malezi bora, ulinzi na mazingira ya kujifunza wakati wa likizo, badala ya kukaa nyumbani bila shughuli za kuwaendeleza.

Hata hivyo, amesema shule binafsi zinazoanza kukua hukutana na changamoto mbalimbali za uendeshaji, ikiwamo kodi na michango ya taasisi mbalimbali, ambazo wakati mwingine huongeza gharama na kuwa mzigo kwa shule zenye idadi ndogo ya wanafunzi.

Ameishauri Serikali kuangalia mazingira ya shule changa ili kuziwezesha kukua na kuendelea kutoa huduma bora za elimu.

Kwa upande wake, Mkuu wa Shule hiyo, Christine Mwima, amewataka wazazi kuongeza ushiriki wao katika maendeleo ya elimu ya watoto kwa kufuatilia masomo, kazi za nyumbani (homework) na maendeleo yao kwa ujumla, badala ya kuliachia jukumu hilo walimu pekee. Amesema ushirikiano wa wazazi na walimu ni muhimu katika kujenga msingi imara wa elimu na maadili.

Mwima pia amesisitiza umuhimu wa wazazi kufuatilia matumizi ya mitandao ya kijamii kwa watoto wao, kuhakikisha wanaitumia kwa manufaa ya kujifunza na kujenga ujuzi, huku akibainisha kuwa malezi bora ni jukumu la pamoja kati ya familia na shule kwa kuwa watoto wa sasa ndio viongozi wa baadaye.

Naye Margreth Fabian, mzazi wa Amaris Charles, mwanafunzi wa shule hiyo, amesema ushirikiano kati ya wazazi na Almes International School umechangia kuleta mabadiliko chanya kwa watoto, hususan katika maendeleo ya masomo, uwezo wa kujieleza na mwenendo wa kitabia.

Amesema wazazi wanapaswa kuendelea kufuatilia matumizi ya mitandao ya kijamii kwa watoto na kuwaelekeza kuitumia katika shughuli zenye tija, ikiwamo kujifunza na kufanya kazi za shule.