MAKALLA KUTATUA MGOGORO WA ARDHI MAKUYUNI

Na Mwandishi Wetu, Arusha.

MKUU wa Mkoa wa Arusha, CPA Amos Gabriel Makalla, ameingilia kati mgogoro wa ardhi uliodumu kwa takribani miaka 20 katika Kijiji cha Makuyuni, Wilaya ya Monduli, kwa kupendekeza ekari 100 za eneo la mwekezaji kutengwa kwa ajili ya wananchi wa Kitongoji cha Zaburi.

Hatua hiyo inalenga kupata suluhisho la kudumu la mgogoro huo uliohusisha wananchi kuvamia eneo la ekari 200 linalomilikiwa na kampuni ya Rhino Equipment & Transportation na kuanzisha makazi pamoja na shughuli mbalimbali za kiuchumi.

Akizungumza na wananchi wa Kitongoji cha Zaburi, Novemba 6, 2026, Makalla alisema kampuni hiyo ndiyo mmiliki halali wa eneo hilo, lakini Serikali imependekeza sehemu ya ardhi hiyo kutengwa kwa wananchi kutokana na uwepo wa kitongoji kilichosajiliwa na kuendelezwa kwa miundombinu ya kijamii.

Alisema kitongoji hicho tayari kina huduma muhimu zikiwemo msikiti, kanisa, shule ya awali, maji na umeme, hali inayohitaji suluhisho linalozingatia maslahi ya wananchi na haki za mwekezaji.

Aidha, Makalla aliuagiza uongozi wa kampuni hiyo kukutana na wananchi walioingia katika eneo lake jingine lenye ukubwa wa ekari 100 ili kujadiliana na kufikia makubaliano yatakayowezesha matumizi sahihi ya ardhi hiyo na kumaliza mgogoro huo.

Aliwataka wananchi kuwa watulivu na kusitisha uvamizi pamoja na shughuli za kuendeleza maeneo hayo hadi mazungumzo na makubaliano yatakapokamilika.

Pia, aliiagiza Halmashauri ya Wilaya ya Monduli kusimamia utekelezaji wa maelekezo hayo na kuhakikisha eneo litakalotengwa kwa ajili ya wananchi linakuwa na mpango mzuri wa matumizi ya ardhi.

Akizungumza kwa niaba ya wananchi, Mzee Leng’ida alisema hatua iliyochukuliwa na Mkuu wa Mkoa pamoja na timu yake imerejesha matumaini kwa wakazi wa Kitongoji cha Zaburi ambao kwa muda mrefu wamekuwa wakikabiliwa na sintofahamu kuhusu hatma ya makazi yao.

Alisema busara na hekima zilizotumika katika kutafuta suluhisho la mgogoro huo zitasaidia kuleta matumaini mapya na kuwarejeshea wananchi amani.

Kwa upande wake, Mwenyekiti wa Kijiji cha Makuyuni, Ngayoki, alisema atahakikisha maelekezo yote yaliyotolewa na Mkuu wa Mkoa yanatekelezwa katika ngazi ya kijiji na kata kwa kushirikiana na wananchi.

Naye mkazi wa Kitongoji cha Zaburi, Naserian Saitabau, alisema mgogoro huo umewafanya wananchi kuishi kwa taharuki kwa miaka mingi kutokana na kutokuwa na uhakika wa hatma ya makazi yao.

Alisema hatua ya Mkuu wa Mkoa kuingilia kati imewapa matumaini mapya ya kupata suluhisho la kudumu litakalowawezesha kuishi kwa amani na kuendelea na shughuli zao za maendeleo.

WAZIRI PROF.MBARAWA ATOA MAAGIZO KWA BODI MPYA YA MAGAVANA DMI

Waziri wa Uchukuzi, Profesa Makame Mbarawa, ametoa maelekezo kwa Bodi mpya ya Magavana ya Chuo cha Bahari Dar es Salaam (DMI), yakilenga kuimarisha ubora wa elimu na mafunzo, kuongeza ajira kwa mabaharia wa Tanzania na kukifanya chuo kitambulike kimataifa.

Akizungumza katika uzinduzi wa Bodi hiyo, alisema ni mwanzo wa ukurasa mpya wa uwajibikaji, ufanisi na matokeo. Alitaka bodi isimamie uboreshaji wa mitaala, mafunzo kwa wakufunzi na upatikanaji wa vifaa vya kisasa vya kufundishia ili kuzalisha wahitimu wenye ujuzi wa kushindana katika soko la ajira la ndani na kimataifa.

Aliitaka bodi, kwa kushirikiana na menejimenti, kuweka mikakati ya kuongeza ajira kwa mabaharia kupitia ushirikiano na kampuni za meli, waendeshaji wa bandari na taasisi za kimataifa, pamoja na mfumo wa kufuatilia maendeleo ya wahitimu.

Pia alisisitiza utawala bora, uwajibikaji na uadilifu, na tafiti na ubunifu vielekezwe katika kutatua changamoto za bandari, usafiri wa majini, usalama baharini na uchumi wa buluu. Aliielekeza DMI kushirikiana na Shirika la Uwakala wa Meli Tanzania (TASAC) kuandaa kanzidata ya wataalamu wa Kitanzania wa sekta ya bahari waliopo nchini na nje ya nchi.

Aidha, alitaka fedha za Serikali zitumike kwa ufanisi, akionya dhidi ya ucheleweshaji, ongezeko la gharama lisiloelezeka na ununuzi wa vifaa visivyokidhi viwango, na akahimiza chuo kuongeza mapato kupitia mafunzo, tafiti na huduma za ushauri, kwa kuzingatia malengo yanayopimika na muda maalumu wa utekelezaji.

Mwenyekiti wa Bodi, Mhandisi Mkuu Paul Olekashe, alitaja changamoto kuwa ni upatikanaji wa meli ya mafunzo, vifaa vya kisasa na utambuzi wa vyeti vya mabaharia kimataifa. Alisema chuo kinaandaa mradi wa meli ya mafunzo, na akaiomba Wizara kuharakisha utekelezaji wake na kusaidia vyeti vitambuliwe kimataifa.

Kwa upande wake, Mkuu wa Chuo, Profesa Tumaini Gurumo, alisema wanafunzi wa mafunzo ya bahari wameongezeka kutoka 1,500 hadi 7,000 kwa mwaka, huku idadi ya walimu ikiongezeka kutoka chini ya 100 miaka mitano iliyopita hadi takribani 220 sasa, aliongeza kuwa Serikali inaendelea kukiimarisha chuo kwa kukipatia vifaa vya kisasa vya kufundishia ili kuboresha ubora wa mafunzo.

WAZIRI WA FEDHA ZANZIBAR AIPONGEZA TRA KWA KUIMARISHA NA KUWEZESHA BIASHARA KATI YA TANZANIA BARA NA ZANZIBAR

    

Waziri wa Fedha na Mipango wa Serikali ya Mapinduzi Zanzibar Mhe. Dkt. Juma Malik Akil ameipongeza Mamlaka ya Mapato Tanzania (TRA) kwa kuendelea kuimarisha na kuwezesha biashara kati ya Tanzania Bara na Zanzibar.

DKT. KIJAJI AKUTANA NA WAWEKEZAJI NA WADAU WA UTALII UINGEREZA

London, Uingereza, Novemba 6, 2026

Waziri wa Maliasili na Utalii, Mhe. Dkt. Ashatu Kijaji (Mb), akiwa ameambatana na Katibu Mkuu wa Wizara hiyo, Dkt. Hassan Abbasi, leo Novemba 6, 2026, ameshiriki Mkutano wa Uwekezaji na Wawekezaji pamoja na wadau wa sekta ya utalii nchini Uingereza, ikiwa ni sehemu ya mwendelezo wa ziara yake jijini London.

UJENZI WA NJIA YA KUPELEKA UMEME KISIWANI MAFIA KUNUFAISHA WANANCHI MKURANGA

 

📌 Ni kupitia kupata umeme wa uhakika na ajira wakati wa utekelezaji wa mradi.

📌 Wananchi wapatiwa elimu namna ambavyo mradi utachochea shuhhuli za kiuchumi.

📍 MKURANGA, PWANI | Novemba, 2026

Na Mwandishi wetu,

Wananchi wilayani Mkuranga Mkoa wa Pwani wanatarajiwa kunufaika na mradi mkubwa wa njia ya kusafirisha meme ya kilovoti 33 kupitia waya  maalumu itakayopita chini ya bahari kutoka Mkuranga hadi Visiwa vya Mafia.

Akizungumza wakati wa utoaji wa elimu kwa wananchi kuhusu umuhimu wa mradi huo, Katibu Tawala wa Wilaya ya Mkuranga, Bw. Omary Said amesema utekelezaji wa mradi huo unalenga kuongeza utoaji wa huduma ya umeme, kuchochea shughuli za uzalishaji na maendeleo kwa Wananchi.

Ameipongeza Serikali kupitia TANESCO kwa kuendelea kupanua huduma za umeme, akieleza kuwa mradi huo utakuwa kichocheo cha ukuaji wa shughuli za kiuchumi, hususan katika maeneo ambayo bado hayajafikiwa na huduma ya umeme.

“Tunawapongeza wenzetu wa TANESCO kwa kuendelea kutanua wigo wa huduma za umeme. Tunaamini mradi huu utaleta maendeleo kwa wananchi kuongeza shughuli za kiuchumi na kuimarisha ustawi wa jamii". Amesema Bw. Said.

Ameongeza kuwa Wilaya ya Mkulanga itaendelea kushirikiana na Shirika la Umeme Tanzania (TANESCO) kuhakikisha mradi unatekelezwa kwa mafanikio na ubora wa hali ya juu na kutokuwepo kwa vikwazo ili uweze Kukamilika nakua manufaa kwa Wananchi.

Akizungumza kwa niaba ya Mratibu wa Mradi huo, Mha. Joffrey Katoto amesema TANESCO inatekeleza mradi wa kupeleka umeme Zanzibar na Mafia na mradi huo kwa ujumla una thamani ya dola za Marekani milioni 283.

"Mradi huu una maeneo matatu ambayo ni njia ya kusafirisha umeme  kutoka Mkuranga hadi Mafia Kilovoti 33,  kutoka Tanga hadi Pemba kilovoti 132 na njia ya kusafirisha umeme kutoka Ununio hadi Unguja kilovoti 220". Amesema Mha. Katoto.

Baadhi ya Wananchi na viongozi wa Vijiji katika maeneo yatakayopitiwa na mradi, wamesema semina hiyo imewasaidia kuelewa maeneo sahihi mradi utakapopita, maeneo yatakayo athiriwa na mradi pamoja na namna ya kushughulikia changamoto zinazoweza kujitokeza wakati wa utekelezaji wa mradi.

Semina hiyo ni sehemu ya maandalizi ya utekelezaji wa mradi huo, yakilenga kujenga uelewa na ushirikiano kati ya TANESCO, viongozi wa Serikali na wananchi ili kurahisisha utekelezaji wake, pamoja na kuwajengea utayari viongozi katika maeneo hayo wa kutatua kwa haraka migogoro inayoweza kujitokeza wakati wa utekelezaji wake.

TANZANIA YAUNGA MKONO MPANGO WA PAMOJA WA EAC KUKABILI ATHARI ZA EL NINO

Na, Mwandishi Wetu - Nairobi, Kenya

TANZANIA imesisitiza dhamira yake ya kuunga mkono Mpango wa Dharura wa Jumuiya ya Afrika Mashariki (EAC) wa kukabiliana na mvua zinazotarajiwa za El Niño, huku ikihimiza nchi wanachama kuimarisha ushirikiano, kubadilishana taarifa kwa wakati na kuchukua hatua za pamoja ili kupunguza madhara yanayoweza kujitokeza kwa wananchi, miundombinu na shughuli za kiuchumi.

Hayo yameelezwa na Naibu Waziri wa Ardhi, Nyumba na Maendeleo ya Makazi, Mhe. Kaspar Mmuya akimwakilisha Waziri wa Nchi Ofisi ya Waziri Mkuu (Sera, Bunge, Uratibu na Wenye Ulemavu) Prof. Palamagamba Kabudi wakati wa Mkutano wa Dharura wa Mawaziri wa Kisekta wa kujadili maandalizi na hatua za pamoja za kukabiliana na mvua hizo, uliofanyika  Nairobi, Kenya Novemba 06, 2026.

Mhe. Mmuya alieleza kuwa majanga yanayotokana na mabadiliko ya tabianchi hayaishii katika mipaka ya nchi moja, hivyo nchi wanachama wa EAC zinapaswa kushirikiana katika kukabiliana na hatari hizo na kuimarisha uwezo wa ukanda wa Afrika Mashariki wa kudhibiti athari zake.

Alibainisha kuwa Tanzania inaendelea kuimarisha mifumo ya tahadhari za mapema, ufuatiliaji wa hali ya hewa, tathmini ya maeneo hatarishi na utoaji wa elimu kwa umma, pamoja na kuboresha mifumo ya kukabiliana na dharura.

Mkutano huo ambao ulihudhuriwa pia na Naibu Waziri wa Mambo ya Nje na Ushirikiano wa Afrika Mashariki (EAC), Mhe. James Millya, uliridhia Mpango huo wa Dharura wa EAC wa Kukabiliana na Madhara ya El Niño (EAN-PREP), unaolenga kuimarisha ushirikiano wa nchi wanachama katika utoaji wa tahadhari za mapema na kukabiliana na athari zake katika sekta muhimu kama vile afya, miundombinu, kilimo, na usalama wa chakula. 

Sekretarieti ya EAC imetakiwa kuhakikisha kuwa inatafuta rasilimali za utekelezaji wa mpango huo na kuimarisha ushirikiano na IGAD pamoja na taasisi za utabiri wa hali ya hewa za kitaifa.

=MWISHO=

VIJANA 985 WANAOKWENDA KUFANYA KAZI NJE YA NCHI WAAGWA

Na. OWM (KAM) – Dar es Salaam


Serikali imeonya kuwa haitasita kuchukua hatua kali dhidi ya mawakala binafsi wa huduma za ajira au mtu yeyote atakayebainika kujihusisha na udanganyifu, ukiukwaji wa taratibu za ajira au usafirishaji haramu wa Watanzania kwenda kufanya kazi nje ya nchi.

Kauli hiyo imetolewa Novemba 2026, jijini Dar es Salaam na Waziri wa Nchi, Ofisi ya Waziri Mkuu – Kazi, Ajira na Mahusiano, Mhe. Deus C. Sangu, wakati wa hafla ya kuwaaga vijana 985 wanaokwenda kufanya kazi katika nchi mbalimbali nje ya Tanzania.

Mhe. Sangu alisema Serikali inatambua na kuthamini mchango wa mawakala binafsi wa huduma za ajira katika kuwaunganisha Watanzania na fursa za ajira ndani na nje ya nchi, lakini akasisitiza kuwa mchango huo unapaswa kuendana na uzingatiaji wa sheria, weledi, uwazi na uwajibikaji.

Akizungumza na vijana hao, Mhe. Sangu alisema Serikali ina imani nao na kuwataka kuwa mabalozi wazuri wa Tanzania kwa kufanya kazi kwa bidii, uadilifu na weledi, huku wakizingatia sheria, mila na desturi za nchi wanazokwenda kufanya kazi.

“Tumieni ujuzi wenu kujenga imani kwa waajiri na kufungua fursa zaidi kwa Watanzania wengine. Kila mmoja anatakiwa kuwa tayari kujituma na kutumia fursa hizi kama chachu ya kuboresha maisha yake, kuinua familia yake na kuchangia maendeleo ya Taifa,” alisisitiza Mhe. Sangu.

Katika hatua nyingine, Mhe. Sangu alisema Serikali imeendelea kuimarisha ushirikiano wa kikanda na kimataifa kupitia majukwaa mbalimbali yanayolenga kuratibu uhamaji salama wa nguvukazi na kuongeza fursa za ajira kwa Watanzania.

Aidha, aliwahimiza vijana kuendelea kuomba nafasi za ajira za mafundi zilizotangazwa katika Umoja wa Falme za Kiarabu (UAE), akitangaza kuongeza muda wa kuwasilisha maombi hayo kutoka Novemba 3 hadi Novemba 8, 2026, ili kuwapa nafasi waombaji wengi zaidi kushiriki.

Kwa upande wake, Mkurugenzi wa Idara ya Mashariki ya Kati kutoka Wizara ya Mambo ya Nje na Ushirikiano wa Afrika Mashariki, Balozi Abdallah Kilima, aliwataka vijana hao kufanya kazi kwa bidii, kutunza nyaraka zao muhimu na kutumia njia rasmi za mawasiliano wanapohitaji msaada.

Naye Kaimu Mkurugenzi wa Ajira na Ukuzaji Ujuzi, Ofisi ya Waziri Mkuu – Kazi, Ajira na Mahusiano, Bi. Neema Moshi, alisema Ofisi hiyo itaendelea kuratibu upatikanaji wa fursa za ajira kwa vijana kwa lengo la kuchochea ustawi wa wananchi na maendeleo ya Taifa.

Kwa upande wake, Mwakilishi wa Mkurugenzi Mkuu wa Mfuko wa Taifa wa Hifadhi ya Jamii (NSSF), Bw. Robert Kadege, ambaye ni Meneja wa Huduma kwa Wateja wa Mfuko huo, aliwapongeza vijana hao kwa kujiunga kwa wingi katika mfumo wa hifadhi ya jamii ili kujiwekea akiba na kuimarisha usalama wao wa kifedha wa baadaye.

Akizungumza kwa niaba ya mawakala binafsi wa ajira, Mwenyekiti wa mawakala hao, Bw. Abdallah Mohammed, alisema sekta hiyo itaendelea kushirikiana kwa karibu na Serikali katika kupunguza tatizo la ukosefu wa ajira na kurasimisha ushiriki wa vijana katika soko la ajira la kimataifa.

DODOMA YAIPONGEZA TASAC KWA KUUNGANISHA WADAU KUPUNGUZA FOLENI ZA MAGARI YA MIZIGO

 

Na Mwandishi Wetu, Dodoma

KAIMU Mkuu wa Mkoa wa Dodoma, Janeth Mayanja, ameipongeza Shirika la Uwakala wa Meli Tanzania (TASAC) kwa juhudi za kuwaunganisha wadau wa sekta ya uchukuzi katika kutafuta suluhisho la changamoto ya foleni za magari ya mizigo, pamoja na kuimarisha ufanisi wa usafirishaji wa shehena nchini.

Mayanja, ambaye pia ni Mkuu wa Wilaya ya Chamwino, ametoa pongezi hizo Novemba 5, 2026, alipokuwa akizungumza kwa niaba ya Mkuu wa Mkoa wa Dodoma wakati wa kikao na Bodi ya Wakurugenzi ya TASAC iliyomtembelea ofisini kwake mkoani humo.

Amesema Dodoma ina fursa kubwa ya kuwa kitovu muhimu cha shughuli za usafirishaji na biashara nchini, hususan kupitia uwekezaji katika miundombinu ya bandari kavu, hatua itakayosaidia kupunguza msongamano wa magari ya mizigo katika Bandari ya Dar es Salaam na kurahisisha usafirishaji wa shehena kwenda maeneo mbalimbali nchini na nchi jirani.

Amesema mkoa huo una maeneo yenye fursa nyingi za uwekezaji, hivyo amewahimiza wawekezaji wa ndani na nje ya nchi kuzitumia fursa hizo, akisisitiza kuwa Serikali ya Mkoa iko tayari kushirikiana nao kuwezesha uwekezaji wenye tija kwa maendeleo ya mkoa na taifa kwa ujumla.

Aidha, ameiomba TASAC kuwa balozi wa Mkoa wa Dodoma kwa kutangaza fursa zilizopo na kuhamasisha wawekezaji kuelekeza mitaji yao katika sekta ya uchukuzi, hususan ujenzi na uboreshaji wa miundombinu ya bandari kavu.

Kwa upande wake, Mwenyekiti wa Bodi ya Wakurugenzi ya TASAC, Nahodha Mussa Mandia, amesema ziara hiyo ni sehemu ya utekelezaji wa majukumu ya bodi katika kufuatilia maendeleo ya miundombinu na shughuli za sekta ya uchukuzi, kutathmini hali halisi ya utoaji huduma na kuimarisha ushirikiano na Serikali za Mikoa pamoja na wadau mbalimbali.

Amesema katika ziara hiyo, bodi imetembelea maeneo ya Shirika la Reli Tanzania (TRC) yaliyopo Ihumwa na Bahi mkoani Dodoma, yanayohusika na kuhudumia na kusafirisha shehena za mizigo kutoka ndani na nje ya nchi.

Ameeleza kuwa ziara hiyo inalenga kutathmini hali ya miundombinu na shughuli za usafirishaji katika maeneo hayo, kubaini fursa za uwekezaji na maeneo yanayohitaji maboresho, pamoja na kuimarisha ushirikiano wa kimkakati utakaosaidia kuongeza ufanisi wa huduma za usafirishaji na kupunguza changamoto zinazokwamisha mtiririko wa shehena nchini.

Juhudi hizo ni sehemu ya mkakati wa kuimarisha mfumo wa usafirishaji wa mizigo nchini kwa kuunganisha wadau, kuboresha miundombinu na kutumia fursa za uwekezaji zilizopo katika maeneo mbalimbali.

RAIS DK.SAMIA AAGANA NA BALOZI WA AFRIKA KUSINI ANAYEMALIZA MUDA WAKE NCHINI LEO

Rais wa Jamhuri ya Muungano wa Tanzania, Dkt. Samia Suluhu Hassan, akiwa kwenye mazungumzo na Mhe. Noluthando Mayende-Malepe, Balozi wa Afrika Kusini anayemaliza muda wake nchini Tanzania, Ikulu Jijini Dar es Salaam, tarehe 06 Novemba, 2026.



















Rais wa Jamhuri ya Muungano wa Tanzania, Dkt. Samia Suluhu Hassan, akiwa kwenye picha na Mhe. Noluthando Mayende-Malepe, Balozi wa Afrika Kusini anayemaliza muda wake nchini Tanzania, Ikulu Jijini Dar es Salaam, tarehe 06 Novemba, 2026.

SERIKALI YASISITIZA MKAKATI WA NISHATI SAFI YA KUPIKIA WALENGA KUWAFIKIA WANANCHI VIJIJINI

 

Serikali imesema inaendelea kutekeleza Mkakati wa Taifa wa Matumizi ya Nishati Safi ya Kupikia unaolenga kuhakikisha asilimia 80 ya Watanzania wanatumia nishati safi ya kupikia ifikapo mwaka 2034, ikiwa ni sehemu ya jitihada za kumtua mama kuni kichwani na kupunguza athari za matumizi ya nishati isiyosafi .

Akijibu swali la Mbunge wa Viti Maalumu, Mary Francis Masanja, Naibu Waziri wa Nishati alisema Serikali, kupitia Wakala wa Nishati Vijijini (REA), inaendelea kutekeleza mradi wa kusambaza mitungi ya gesi oevu (LPG) ya kilo sita yenye ruzuku pamoja na majiko banifu yenye ruzuku katika vijiji na vijiji-miji.

Mhe. Salome alisema hatua hiyo inalenga kuongeza upatikanaji wa nishati safi ya kupikia kwa wananchi, hususan wanaoishi vijijini, ambako matumizi ya kuni na mkaa yanaendelea kuwa changamoto kwa kaya nyingi.

Aidha, Serikali inaendelea kushirikiana na wadau mbalimbali kutekeleza miradi ya nishati safi ya kupikia katika maeneo ya vijijini, pamoja na kutoa elimu na kuhamasisha jamii kuhusu umuhimu wa kutumia nishati hiyo.

Naibu Waziri wa Nishati Mhe. Salome ,ameeleza kuwa elimu ya matumizi ya nishati safi ya kupikia hutolewa kupitia mikutano, semina na shughuli nyingine zinazolenga kuongeza uelewa wa wananchi kuhusu matumizi ya nishati safi ya kupikia.

Hatua hizo ikiwa ni sehemu ya utekelezaji wa ajenda ya kitaifa ya kumtua mama kuni kichwani, inayolenga kupunguza utegemezi wa kuni na mkaa, kuimarisha afya za wananchi na kupunguza athari za kimazingira zinazotokana na matumizi ya nishati isiyosafi ya kipikia.

Hata hivyo, katika majibu yake, Naibu Waziri wa Nishati, Mhe. Salome ameeleza lengo la Serikali kuwafikia wananchi wote wa vijijini kutumia nishati safi ya kupikia na zimenufaika na mitungi ya gesi na majiko banifu yenye ruzuku.

Serikali inalenga kufikia asilimia 80 ya Watanzania wanaotumia nishati safi ya kupikia ifikapo mwaka 2034, huku utekelezaji wenye matokeo yanayopimika ukiwa muhimu katika kuhakikisha wananchi wa vijijini wananufaika na ajenda hiyo.