KIHONGOSI AIPONGEZA CCM TANGA KWA UJENZI WA NYUMBA 36 ZA WATUMISHI

Na Oscar Assenga, TANGA

KATIBU wa Halmashauri Kuu ya Taifa (NEC), Itikadi, Uenezi na Mafunzo wa Chama Cha Mapinduzi (CCM), Kenani Kihongosi, ameipongeza CCM Mkoa wa Tanga kwa kutekeleza mradi wa ujenzi wa nyumba 36 za watumishi wake wenye thamani ya Sh2.5 bilioni.

Nyumba hizo zinajengwa katika wilaya zote tisa za Mkoa wa Tanga, ambapo kila wilaya inatarajiwa kupata nyumba nne kwa ajili ya kuboresha mazingira ya makazi na utendaji wa viongozi na watumishi wa chama hicho.

Kihongosi alitoa pongezi hizo alipofanya ukaguzi wa maendeleo ya mradi huo katika ziara yake ya siku mbili mkoani Tanga, akisema uimarishaji wa miundombinu ya chama ni sehemu muhimu ya kuweka mazingira bora ya utekelezaji wa majukumu.

Alisema uwepo wa miundombinu na mazingira mazuri ya kazi ni muhimu katika kuhakikisha viongozi na watumishi wa CCM wanatekeleza majukumu yao kwa ufanisi katika ngazi zote.

“Utekelezaji wa Ilani ya CCM unahitaji pia mazingira bora ya kazi na miundombinu inayowezesha shughuli za chama kufanyika kwa ufanisi,” alisema Kihongosi.

Alisema ujenzi wa nyumba hizo unaendana na maelekezo ya chama ya kuimarisha miundombinu yake, hatua ambayo itasaidia kuboresha mazingira ya kazi na makazi kwa watumishi katika ngazi za wilaya.

Kihongosi yupo mkoani Tanga kwa ziara ya siku mbili kwa ajili ya kukagua utekelezaji wa Ilani ya Uchaguzi ya CCM pamoja na shughuli mbalimbali zinazotekelezwa na chama hicho.

Kwa upande wake, Mwenyekiti wa CCM Mkoa wa Tanga alisema tayari ametenga Sh1 bilioni kwa ajili ya kuwezesha na kuharakisha ujenzi wa nyumba hizo.

Alisema mradi huo unatarajiwa kukamilika Februari mwakani na kwamba utakapo kamilika utasaidia kuboresha mazingira ya utendaji kazi kwa viongozi na watumishi wa chama katika maeneo mbalimbali ya mkoa.

Kwa mujibu wa mpango wa ujenzi huo, kila wilaya kati ya wilaya tisa za Mkoa wa Tanga itapata nyumba nne, ambazo zitatumika kama makazi ya watumishi wa CCM katika ngazi hizo.

MBUNGE ANNE KILANGO AIOMBA SERIKALI KUKAMILISHA BARABARA YA LAMI SAME MASHARIKI

MBUNGE  wa Jimbo la Same mashariki wilayani Same Mkoani Kilimanjaro, Anne Kilango Malecela amesema kuwa ili jimbo hilo liweze kukua kiuchumi ni lazima barabara ya Kisiwani Mkomazi Same kujengwa kwa kiwango cha lami.

Anne ametoa kauli hiyo jana katika mkutano wa hadhara wa wananchi uliofanyika katika viwanja vya soko la Kariakoo kata ya Ndungu wakati akimkaribisha Naibu Katibu Mkuu wa Chama cha Mapinduzi Bara, Aggrey Mwanri.

Amesema kuwa, tangu mwaka 2000 alipokuwa Mbungeni kama Mbunge wa kuteuliwa na Rais aliiomba Serikali ya awamu ya tatu, ya nne, ya tano kujenga barabara hiyo lakini alipoingia madarakani Rais Dkt. Samia Suluhu Hassan aliweza kuipitisha barabara hiyo kujengwa kwa kiwango cha lami

"Kwa sasa inamkandarasi mmoja amepewa fedha kidogo kidogo lakini sasa ndio amepewa Bilioni moja na milioni 500 ananza kupita kwa nguvu kuijenga barabara kwa kiwango cha lami" alisema Anna.

Na kuongeza "Hamuwezi kuona akifika haraka huku mimi nipo ndani ya kamati ya miundombinu inayojenga barabara naomba niwahakikishie barabara yenu itajengwa nitaisimamia hii barabara imepitishwa tumshukuru Rais Samia Suluhu Hassan yeye ndio anaenda kutuletea uchumi wa jimbo la Same mashariki".

Mbunge huyo alisema kuwa jimbo la Same mashariki wananchi wake wanakipenda Chama cha Mapinduzi kutokana na fedha nyingi za maendeleo ambazo zimepelekwa jimbo hapo kwa ajili ya miradi mbalimbali ya maendeleo ambapo jumla ya shilingi Bilioni 54.349 zimepokelewa.

Alisema kuwa, kipindi hiki alipoingia madarakani kwa awamu ya pili Januari mwaka huu jimbo hilo lilipokea kiasi cha shilingi Bilioni 44.3 kwa ajili ya ujenzi wa Bwawa la Yongoma.

"Wananchi wa jimbo la Same mashariki ni wakulima wazuri hivyo ujenzi wa bwana hili utawanufaisha wananchi wa Maore, Ndungu na Kihurio kulima mpunga na kujipatia kipato na kukuza uchumi" alisema Anna.

Aliitaja miradi mingine ambayo imepelekewa fedha na serikali ya awamu ya sita na kiwango cha fedha kwenye mabano kuwa ni ujenzi wa shule mpya ya sekondari ya Amali -Malecela kata ya Kihurio,(584,280,029), ujenzi wa  kituo cha Afya Vuje (250,000,000), upanuzi wa kituo cha Afya Vunta (629,995,802).

Miradi mingine ni upanuzi wa miundombinu ya kidato cha tano katika  shule ya sekondari Misufini-Goma (389,400,000), uboreshaji wa skimu ya umwagiliaji kata ya Ndungu (6,988,082,130), ujenzi wa shule mpya ya sekondari (Mkapa) Kata ya Ndungu (584,280,029), fedha za kuchochea jitihada za maendeleo ya Wananchi (53,490,000), ujenzi wa madarasa katika Shule ya Msingi Kidaru (161,300,000), do ujenzi wa madarasa katika Shule ya Msingi Msoroha  (187,300,000), ujenzi wa nyumba ya walimu 2 in 1 katika Shule ya Msingi Mgandu (100,840,907) na ujenzi wa madarasa 4 na matundu 9 ya choo shule ya msingi Kigulunde (120,378,221).

RABIA: CCM INAENDELEA KUSHUGHULIKIA MATATIZO YA WANANCHI

 

Singida, Tanzania 

Katibu wa Halmashauri Kuu ya CCM Taifa, Idara ya Mambo ya Siasa na Uhusiano wa Kimataifa (SUKI), Ndg. Rabia Abdalla Hamid, amesema Chama Cha Mapinduzi (CCM) kitaendelea kutimiza wajibu wake wa kushughulikia changamoto na matatizo yanayowakabili wananchi kwa vitendo.

Rabia amesema hayo leo, Septemba 24, 2026, alipokuwa katika ziara mkoani Singida, ambapo amepokelewa katika Ofisi za CCM Mkoa wa Singida na baadaye kutembelea Jengo la Wazazi katika Hospitali ya Mkoa wa Singida, mjini Singida.

Akiwa hospitalini hapo, Rabia amejionea utekelezaji wa Ilani ya CCM, hususan katika utoaji wa huduma za afya kwa wanawake na watoto.

Katika ziara hiyo, pia ametembelea vikundi vya wajasiriamali na kusikiliza changamoto mbalimbali zinazowakabili, huku akitoa maelekezo ya namna ya kuzitatua.

Aidha, amekutana na kusikiliza maoni na changamoto za makundi mbalimbali ya kijamii, yakiwemo viongozi wa dini, wazee, machifu, wakulima, wafugaji, wafanyabiashara, mafundi gereji, mafundi ujenzi, wanamichezo, wanafunzi wa vyuo, walimu, machinga, mawinga, mama na baba lishe, watu wenye mahitaji maalum, wajane na wagane, vyama vya ushirika pamoja na maafisa usafirishaji.

Akizungumza wakati wa ziara hiyo, Rabia amesema CCM itaendelea kuwa karibu na wananchi na kuhakikisha changamoto zao zinapatiwa ufumbuzi kwa kuzingatia utekelezaji wa Ilani ya Uchaguzi ya CCM ya mwaka 2025–2030.

“CCM itaendelea kutimiza wajibu wake kikamilifu wa kushughulikia changamoto pamoja na matatizo ya wananchi, kama ilivyoahidi katika Ilani yake ya 2025–2030. Hivyo, wananchi waendelee kuiamini CCM kwani ipo kazini kuhakikisha changamoto zao zinapatiwa ufumbuzi wa moja kwa moja,” amesema Rabia.

MBUNGE WA KILINDI SALEHE MHANDO AUNGANA NA WANANCHI WAKE KUSUKUMA MAENDELEO JIMBONI KWAKE .

 MAMIA ya wananchi wa Kata ya Pagwi, Wilaya ya Kilindi, mkoani Tanga, wamejitokeza kwa wingi kumlaki Mbunge wa Jimbo la Kilindi, Mhe. Salehe Mbwana Mhando, wakati wa ziara yake katika Vijiji vya Pagwi, Lumotio na Chamtui.

Ziara hiyo imekuwa ya aina yake baada ya Mhe. Mhando kuonyesha kwa vitendo mshikamano na wananchi katika kusukuma maendeleo, ikiwemo kubeba mwenyewe mifuko ya saruji mabegani kuelekea eneo la ujenzi wa Zahanati ya Pagwi.

Katika ujenzi huo unaotekelezwa kwa nguvu za wananchi, Mhe. Mhando alikabidhi mifuko 50 ya saruji pamoja na Sh500,000 taslimu kwa ajili ya kuunga mkono ujenzi huo.

Mbunge huyo pia aliahidi kuongeza mifuko mingine 100 ya saruji, akisema hatua hiyo inalenga kuongeza kasi ya kukamilika kwa zahanati hiyo na kuwawezesha wananchi kupata huduma za afya karibu na makazi yao.

Zahanati hiyo inatarajiwa kupunguza adha ya wananchi wa Pagwi ambao wamekuwa wakilazimika kusafiri hadi Lumotio kufuata huduma za afya.

Akizungumza na wananchi wakati wa ziara hiyo, Mhe. Mhando alisema ataendelea kuifuatilia Kata ya Pagwi na kusukuma mbele hoja za maendeleo, akisisitiza kuwa changamoto za wananchi zinapaswa kutafutiwa ufumbuzi hatua kwa hatua.


“NITAITIFUA TIFUA PAGWI HADI KIELEWEKE,” alisema Mhe. Mhando, akiahidi kuendelea kufuatilia kwa karibu masuala ya maendeleo katika kata hiyo.

Alitaja maeneo ya kipaumbele kuwa ni pamoja na barabara, maji, umeme, afya na madaraja, akisema miundombinu bora ni muhimu kwa maendeleo ya wananchi na shughuli zao za kiuchumi.

BARABARA SUNYA–PAGWI–MAKELELE

Mhe. Mhando pia alizungumzia changamoto ya barabara ya Sunya–Pagwi–Makelele, akisisitiza umuhimu wa kuendelea kuifuatilia ili kurahisisha usafiri na usafirishaji wa bidhaa kwa wananchi.

Aidha, aligusia changamoto ya Daraja la Makelele, linalounganisha maeneo ya Lumotio na Makelele, akisema wakati jitihada za kupata daraja la kudumu zikiendelea, ni muhimu kutafutwa kwa haraka kwa daraja la muda ili wananchi wasikwame katika shughuli zao.

Alisema pia kuna umuhimu wa kuendelea kufungua mawasiliano ya barabara katika njia za Sunya–Lumotio–Makelele–Sambu–Songe, pamoja na Kikunde–Chamtui–Lumotio–Sunya.

UMEME WAFIKA MALALI NA MASIMBA

Katika sekta ya umeme, Mhe. Mhando alisema maeneo ya Malali na Masimba tayari yamefikiwa na huduma hiyo, huku akisisitiza kuwa jitihada zitaendelea ili maeneo mengine nayo yaunganishwe na umeme.

ATOA SHILINGI MILIONI MOJA UJENZI OFISI YA KIJIJI.

Akiwa katika Kijiji cha Chamtui, Mhe. Mhando alitoa Sh 1 milioni kwa ajili ya ununuzi wa bati zitakazotumika katika upauaji wa jengo la Ofisi ya Kijiji hicho.

Mbali na hilo, alilipia ada vijana watano kutoka Chamtui kwenda kupata mafunzo ya ufundi katika Chuo cha VETA, hatua inayolenga kuwawezesha kupata ujuzi wa kuwaongezea fursa za kujiajiri na kushiriki katika shughuli za kiuchumi.
MICHEZO YAPATA MSUKUMO

Mhe. Mhando pia alitoa jezi kwa timu mbalimbali za soka katika maeneo aliyotembelea, zikiwemo Lipuli FC ya Chamtui, Mikocheni FC ya Mtakuja, Azam FC ya Chang’ombe na Toto FC ya Nyamaleni.

Aidha, alikabidhi jezi kwa timu mbili za Kijiji cha Pagwi pamoja na jozi moja kwa ajili ya wanafunzi.

WANANCHI TUMEONA JITIHADA ZA MBUNGE WETU

Kwa upande wao, wananchi wa Kata ya Pagwi walimshukuru Mhe. Mhando kwa kuwafikia, kuwasikiliza na kushirikiana nao katika kutafuta ufumbuzi wa changamoto zinazowakabili.

Walisema wamefarijika kuona Mbunge wao akijikita katika masuala yanayogusa maisha yao moja kwa moja, yakiwemo afya, barabara, maji, umeme, madaraja, elimu na fursa kwa vijana.

Wananchi hao pia walimshukuru Rais wa Jamhuri ya Muungano wa Tanzania, Dkt. Samia Suluhu Hassan, kwa kuendelea kuunga mkono utekelezaji wa miradi ya maendeleo nchini.

Ziara ya Mhe. Mhando katika Kata ya Pagwi imeweka msisitizo katika ushirikiano kati ya wananchi na viongozi katika kutafuta ufumbuzi wa changamoto za maendeleo, huku ahadi na michango iliyotolewa ikitarajiwa kuongeza kasi ya utekelezaji wa baadhi ya miradi katika eneo hilo.

RAIS SAMIA ANATAKA VIONGOZI WAWAJIBIKE KUWATUMIKIA WANANCHI - RABIA

 

KATIBU wa Halmashauri Kuu ya CCM Taifa, Mambo ya Siasa na Uhusiano wa Kimataifa (SUKI), Rabia Abdalla Hamid, amesema Mwenyekiti wa CCM na Rais wa Jamhuri ya Muungano wa Tanzania, Dkt. Samia Suluhu Hassan, anataka viongozi wote kuwajibika kikamilifu katika kuwahudumia wananchi na kutatua changamoto zinazowakabili.

Rabia ameyasema hayo leo, Septemba 23, 2026, wakati akiendelea na ziara ya CCM katika Mkoa wa Dodoma yenye lengo la kusikiliza, kuzungumza na kutatua changamoto za wananchi kutoka makundi mbalimbali ya kijamii.

Katika ziara hiyo, Rabia amekutana na wananchi waliojitokeza kuwasilisha changamoto, maoni, ushauri na mapendekezo mbalimbali yanayohusu maisha na maendeleo yao.

Baada ya wananchi kuwasilisha changamoto zao, Mkuu wa Mkoa wa Dodoma amejibu hoja zilizowasilishwa na kuahidi kuendelea kuwahudumia wananchi wa mkoa huo kwa ufanisi.

Aidha, Rabia amesema viongozi wanapaswa kuwa karibu na wananchi, kuwasikiliza na kuhakikisha changamoto zao zinapatiwa ufumbuzi kwa wakati, akisisitiza kuwa huo ndiyo mwelekeo unaotolewa na uongozi wa juu wa CCM na Serikali.

Katika hatua nyingine, Rabia amempongeza Mkuu wa Mkoa wa Dodoma kwa kazi nzuri anayofanya katika kuwahudumia wananchi pamoja na kuwa msikivu kwa changamoto zao. 

CHATANDA: NDEJEMBI ANA UWEZO MKUBWA WA KUMSAIDIA MAJUKUMU RAIS WETU

 NA MWANDISHI WETU, DODOMA

Makamu wa Rais, Deogratius Ndejembi, ameelezwa kuwa kiongozi mahiri, muadilifu na mzalendo, mwenye uwezo wa kumsaidia majukumu Rais Dk. Samia Suluhu Hassan.

Hayo yameelezwa na Mwenyekiti wa Umoja wa Wanawake wa Chama Cha Mapinduzi (UWT) Taifa, Mary Chatanda, Agosti 30, 2026, ofisini kwake Dodoma, siku moja baada ya kukamilika uapisho wa kiongozi huyo, Ikulu ya Chamwino, Dodoma.

Chatanda ameeleza, Ndejembi ni kiongozi wa vitendo na katika majukumu aliyoaminiwa tangu akiwa Mkuu wa wilaya ya Kongwa, Mbunge, Naibu Waziri na Waziri kamili katika wizara mbalimbali.

"Kule Kongwa Dodoma akiwa Mkuu wa wilaya alifanya kazi nzuri na katika kilimo alisimamia kwa mafanikio makubwa kampeni yake aliyoiita ONJAKO yaani Ondoa Njaa Kongwa. Alihimiza wananchi kulima mazao yanayostahimili ukame kama mtama, mihogo, ufuta na alizeti ili kuwaepusha wananchi na kadhia ya njaa," amesema Chatanda.

Ameongeza kuwa, kampeni ya ONJAKO ilipokelewa vizuri na wakulima wa Kongwa kutokana na mwanzo kutilia mkazo zao la mahindi ambalo mara kwa mara walikuwa wakipata mazao kidogo kutokana na changamoto ya ukame wilayani humo.

Akisisitiza utendaji uliotukuka wa Ndejembi, Chatanda amesema, Wizara kadhaa alizohudumu zikiwemo Tamisemi, Vijana, Ardhi, Nishati, ameacha alama kubwa kwa kuwa mstari wa mbele kutatua changamoto za wananchi.

"Ndejembi si mtu wa kukaa ofisini kusubiri taarifa, anakwenda mwenyewe kujionea utekelezaji wa majukumu na maagizo mbalimbali. Ndiyo maana nasema, Rais Dk. Samia amepata msaidizi mchapakazi na hodari kwelikweli," ameongeza.

Katika hatua nyingine, Mwenyekiti huyo wa UWT Taifa, ametoa rai kwa wananchi kumuombea Rais Dk. Samia, Makamu wa Rais, Ndejembi na viongozi wengine ili waweze kusimamia mipango iliyopo ambayo imejikita katika kukuza ustawi na maendeleo ya wananchi.

Awali, katika uapisho huo, Rais Dk. Samia amemuasa Makamu wa Rais Mteule kuwatumikia Watanzania bila kujali tofauti zao ili kufanikisha utekelezaji wa Ilani ya Uchaguzi ya CCM ya mwaka 2025-2030 na Dira ya Maendeleo ya miaka 25 ijayo (2050).