Rais
wa Taasisi ya Wahandisi;
Ndugu
Mwenyekiti, Kitengo cha Wahandisi Wanawake cha Taasisi ya Wahandisi Tanzania;
Ubalozi
wa Norway;
Msajili
wa Bodi ya Wahandisi;
Ndugu
Wanakamati ya Maandalizi;
Ndugu
Wahandisi Wanawake;
Wanahabari;
Wageni
Waalikwa;
Mabibi
na Mabwana;
Asalaam Aleikum!
Bwana Asifiwe!
Kwanza
kabisa, namshukuru Mwenyezi Mungu, mwingi wa rehema na amani kwa kutujalia
uzima wa afya kuweza kujumuika nanyi. Pili natoa shukrani zangu za dhati kwa Mhe.
Mhandisi Stella Manyanya (Mb), Naibu Waziri wa Elimu Sayansi na Teknolojia, Mwenyekiti
wa Kitengo cha Wahandisi Wanawake Tanzania pamoja na kamati nzima ya maandalizi
kwa mwaliko huu wa kuja kufungua kongamano hili na maonesho. Ni heshima kubwa kwangu. Asanteni sana.
Naweza kusema
nimekuwa mtu mwenye bahati kubwa ya kushirikishwa na kushiriki katika mikutano
mbalimbali inayohusu fani mbalimbali za maendeleo zinazofanywa na wanawake
katika kujikwamua kiuchumi. Leo hii nina furaha isiyo kifani kuwa pamoja na wanawake
ambao wameweza kumudu kikamilifu kazi ambazo hapo awali tuliaminishwa kuwa ni
kazi za mwanaume. Inatia moyo sana kuona kuwa Tanzania tumeweza kupiga hatua
katika kumkwamua mwanamke kiuchumi na kuwa mchango wa mwanamke sasa ni mkubwa
hata kwenye sekta ambazo hapo awali zilitawaliwa na wanaume.
Rais
wa Taasisi ya Wahandisi;
Ndugu
Mwenyekiti, Kitengo cha Wahandisi Wanawake cha Taasisi ya Wahandisi Tanzania;
Mabibi
na Mabwana;
Kama
mlivyosikia katika hotuba ya Mwenyekiti; kitengo cha wanawake wahandisi ni
miongoni mwa vitengo chini ya Taasisi ya Wahandisi Tanzania. Nichukue fursa hii
kuipongeza Taasisi kwa kuunda kitengo hiki na kukipa majukumu ya kuratibu fursa
na changamoto zinazogusa jamii ya Kitanzania; hususani wanawake wahandisi. Ni
imani yangu kuwa mnaitumia fursa hii kuainisha vipaumbele; juhudi; na mafanikio ya
wanawake wahandisi bila kusahau changamoto mbalimbali zinazowakabili wahandisi hawa wanawake na jamii kwa ujumla.
Leo
hii
niwaase kwa kusema kuwa wahandisi wanawake wataongezeka na kuimarika
ikiwa
tu nyinyi ambao mko ndani ya tasnia mtashikamana na kufanya kazi kwa
bidii. Nataka kuwakumbusha ya kwamba iwapo na nyinyi
msingepewa ushirikiano na wanawake wenzenu basi idadi hii ninayoiona
hapa leo ingekuwa ndogo zaidi. Hivyo basi, Naomba mtambue nafasi zenu
na muwe walimu na walezi wa wenzenu katika
fani hii. Vilevile muda umefika sasa wa nyinyi kujitolea kwa hali na
mali
katika kuendesha kampeni za kuwashawishi watoto wa kike ili wajenge ari
ya
kupenda masomo ya sayansi na hisabati ambayo ndiyo msingi wa mafunzo ya
uhandisi.
Napenda kuchukua fursa hii kutoa wito kwa
Ndugu Mwenyekiti ambae pia ni Rais wa Wanawake Wahandisi na Naibu Waziri wa
Wizara ya Elimu, Sayansi na Teknolojia kupitia Wizara yake na Kitengo cha
Wahandisi Wanawake cha Taasisi ya Wahandisi Tanzania kuandaa kampeni mbalimbali
za kuwahimiza wanafunzi hasa wa kike kusoma masomo ya sayansi na hisabati. Nina
imani kuwa kwa nafasi yake kama Mhandisi mwanamke; Naibu Waziri na Mzazi ana
mchango mkubwa wa kuwaelimisha, kuwaunganisha na kuwaendeleza watoto wa
kike ili kuweza kujitambua na kuithamini
nafasi yao katika kuchangia maendeleo ya nchi kupitia fani
za sayansi na teknolojia.
Ndugu Mwenyekiti na
Washiriki wote;
Niwapongeze
kwa kuchagua kauli mbiu yenye kwenda na wakati inayosema ‘Kumwezesha mhandisi mwanamke
kukuza ujuzi katika fani ya uhandisi na kuchangia maendeleo ya jamii’.
Lengo likiwa ni kuhamasisha wanawake wahandisi kuzigundua na kutumia fursa
mbalimbali kujiendeleza katika fani ya uhandisi na kutatua changamoto zinazokabili
jumuiya ya Watanzania.
Serikali
kwa kutambua umuhimu wa wahandisi katika
maendeleo ya nchi hususani katika
sekta za: Nishati; madini; mabarabara; maji; uvuvi, kilimo n.k
imeendelea kuweka mipango madhubuti ya kuinua na kuimarisha fani ya uhandisi.
Serikali imeweka mikakati mbalimbali ikiwemo kuongeza vyuo vya uhandisi kutoka
kimoja miaka ya 1970 mpaka vyuo 9 kwa sasa. Mbali na kuongeza idadi ya vyuo imeendelea
kuongeza maabara katika shule za umma
ili kuwavutia wanafunzi kupenda masomo ya sayansi. Aidha Serikali ya Awamu ya Tano itaendelea
kutenga fedha kwa ajili ya mafunzo kwa njia ya vitendo kwa wanafunzi.
Pamoja na kuongezeka kwa vyuo vya uhandisi na
mikakati mingine ya Serikali, udahili wa wanawake katika fani mbalimbali za
kihandisi umebaki kuwa wa chini. Hivyo basi kuna haja ya kuongeza ushawishi kwa
watoto wa kike kusoma masomo ya sayansi na hisabati na kudahiliwa katika vyuo
vinavyofundisha fani ya uhandisi.
Sambamba
na kupata mafanikio ya kuongeza idadi ya wahandisi watalaamu wanawake kutoka 39 mwaka 2005 hadi 298 mwaka 2015,
bado idadi ya wahandisi wanawake wabobezi imekuwa ndogo. Hii ni moja ya
changamoto ambazo kitengo cha wanawake wahandisi kinatakiwa kufanyia kazi ili
kuhakikisha idadi hii inaongezeka mwaka hadi mwaka.
Ninafarijika
kuona kuwa kongamano limepambwa kwa mihadhara toka kwa wahandisi wanawake
waliobobea na kufanikiwa katika ngazi mbalimbali za kihandisi wakitumia uzoefu
wao kuhamasisha wengine. Mihadhara hiyo inayojumuisha ukuaji katika fani ya
uhandisi na changamoto zake, uvumbuzi na matumizi ya teknolojia, ujasiriamali
na biashara pamoja na utawala na uongozi.
Mada hizi zitasaidia kuwahamasisha na kuwaongoza wanawake wahandisi kufanikiwa
zaidi katika fani.
Niwapongeze pia kwa kujumuisha kongamano na
maonesho ya bidhaa/huduma zinazotolewa na wahandisi wanawake wenye weledi
katika fani zao. Maonesho hayo nayo ni chachu kwa wahandisi wanawake kutumia
ujuzi na fursa zilizopo kuwa wajasiriamali. Ikumbukwe kwamba nchi hii ina vyuo tisa
vinavyofundisha uhandisi, na kutokana na ajira kuwa chache, ujasiriamali unaweza
kuwa suluhisho la kudumu. Hivyo basi
nitoe wito kwa wahandisi
waliojikita kwenye ujasiriamali kuhakikisha kuwa wanafanya biashara
hiyo kwa ustadi mkubwa ili kufikia malengo yao.
Nitoe
pongezi pia kwa kuwajumuisha wanafunzi wa kike wa sekondari na vyuo katika
kuonesha miradi yao. Hii inawapa fursa ya kuonesha uwezo wao katika masomo ya
sayansi na uhandisi na pia kuwapa mazoea ya kujieleza na kujiamini. Vile vile,
shule na vyuo vilivyoonesha miradi yao ni zile zilizoko Dar es Salaam peke yake.
Mnayo changamoto ya kuangalia ni kwa jinsi gani mtaweza kutoa hamasa hii pia kwa
shule na vyuo vilivyo nje ya Dar es Salaam.
Ndugu Mwenyekiti;
Kama
ulivyoeleza awali, kuna changamoto mbalimbali zinazokikabili Kitengo cha
Wahandisi Wanawake. Napenda kuwaahidi kuwa kama serikali, tutazichukua na
kuzifanyia kazi. Lengo ni kuhamasisha wahandisi wanawake kufanya kazi kwa bidii
zaidi na kushirikiana na serikali katika kutatua changamoto mbalimbali zinazoikabili
jamii ya Watanzania.
Serikali
ya awamu ya tano imedhamiria kuwa serikali ya viwanda. Hii ni kusema, serikali
itatumia rasilimali zilizopo kujenga na kuimarisha viwanda vilivyopo nchini,
ili kuhakikisha kwamba Tanzania inafikia uchumi wa kati ifikapo 2025. Matumaini
yetu mtatuunga mkono kwenye azma yetu hii na kuhakikisha mnafanya kazi kwa weledi na
ufanisi wa hali ya juu. Kama Serikali tutahakikisha kuwa nafasi za kusimamia
miradi ya kihandisi itatolewa kwa kampuni za wazawa wenye uzoefu na weledi
kabla ya kutolewa kwa kampuni za nje na iwapo zitapewa kampuni za nje basi
tutazingatia suala zima la ubia.
Kabla
ya kumalizia Hotuba yangu napenda kutoa shukrani zangu za dhati kwa Serikali ya
Norway kwa mchango wao wa Tshs. 4.3bn ili kuchangia mpango wa miaka mitano wa
(2016- 2021) ambao utasaidia kuwajengea
uzoefu wahandisi wanawake ili waweze kusajiliwa na Bodi ya Usajili wa Wahandisi.
Mpango huu unatarajia kunufaisha wanafunzi wa kike 150. Hivyo basi kwa niaba ya Serikali tunasema asante sana kwa marafiki zetu wa Norway. Msaada
huu ni muhimu katika kufanikisha lengo la kufikia uchumi wa viwanda na kipato
cha kati ifikapo 2025. Vilevile utatusaidia katika kufikia lengo namba Tano la
Kumuwezesha Mwanamke kiuchumi la Malengo ya Maendeleo endelevu ya Dunia ya
mwaka 2030.
Nimalizie
kwa kutoa wito kwa Taasisi ya Wahandisi Tanzania kuendelea na jukumu la
kuwaunganisha wahandisi wote walio nje na ndani ya nchi kwa manufaa ya nchi
yetu. Serikali inaikaribisha Taasisi kuishauri katika mambo mbalimbali
yanayohusu uhandisi na wahandisi Tanzania ili kuhakikisha azma ya Tanzania ya
viwanda na uchumi wa kati inafikiwa ifikapo 2025.
Baada
ya kusema hayo, natangaza rasmi Kongamano na Maonesho ya Wahandisi Wanawake 2016
yamefunguliwa.