MWANA FA AKOSHWA NA KAMATI YA USHINDI KATA YA MAJENGP

* Ni Kamati ya kupita nyumba kwa nyumba kuomba kura

* Ikiongozwa na diwani wa kata Mucadam Abbas

* Awakumbusha maneno ya kusema kwa watu majumbani

* Asema CCM itapata ushindi mkubwa

MUHEZA Novemba 24 2024

MBUNGE wa Muheza ambaye pia ni Naibu Waziri wa Utamaduni Sanaa na Michezo mhe Hamisi Mwinjuma almaarufu MwanaFA, amefurahishwa na kamati ya ushindi iliyoundwa kata ya Majengo akisema dhahiri CCM inakwenda kushinda kwa kura nyingi.

Akizungumza na Kamati hiyo kwenye kikao cha ndani cha kuweka mkakati wa kuhakikisha wagombea wa serikali za mitaa katika kata hiyo wote wanapata ushindi mkubwa.

Amesema muda uliobaki kwa ajili ya kampeni na watu kwenda kupiga kura umekwisha hivyo amefurahi kusikia Majengo wameunda Kamati ya kupita nyumba hadi nyumba kuomba kura kwa wagombea lakini pia kuwahamasisha wananchi kujitokeza kupiga kura.

"Tujipange Ili tuweze kushinda muda uliobaki ni mdogo, lakini niseme jambo moja watu wa Majengo mmenifurahisha sana, mmejipanga, Kamati yetu ya nyumba kwa nyumba kama hii ingeundwa Jimbo Zima ingekuwa vizuri sana," alisema MwanaFA na kuongeza "wapinzani hawana nguvu, hawana uwezo wa kushindana na CCM wao kazi yao wakipanda jukwaani wanatoa matusi," alisema.

Mhe mbunge alisema hakuna wakati rahisi wa kukitetea na kukiombea kura Chama Cha Mapinduzi (CCM) kama kipindi hiki kwa kuwa kazi zimefanyika kwa kiwango kikubwa.

Amesema na kwa hilo anampongeza Rais Dkt Samia Suluhu Hassan kwa maono yake ya kuhakikisha katika kata zote 37 za wilaya ya Muheza zimepata miradi yenye kutatua kero za wananchi kuliko wakati mwingine wowote.

"Nyie ni mashahidi miaka mitano iliyopita zipo kata zilikuwa eda, hazikupata mradi hata mmoja...Na hili nampongeaa Rais kwa maono mazuri kwa kuleta miradi chini kabisa kwa wananchi leo hii kata zetu zote 37 zina miradi ya maendeleo," alisema.

WanaFA alisema atakuwa bega Kwa bega na WanaCCM wilayani humo na ameomba wanapopita huko majumbani wawaeleze wananchi ni kwanini wanaombwa kukichagua chama Cha Mapinduzi wawakumbushe miradi iliyotekelezwa katika kata hiyo.

Awali diwani wa kata ya Majengo Mucadam Abbas alisema kata hiyo imeunda Kamati kwa ajili ya kupita nyumba kwa nyumba lakini pia Kila wanapotoka kwenye mikutano ya kampeni wanafanya tathimini kutazama mapungufu na changamoto zilizojitokeza na kuzitafutia ufumbuzi.

Alisema watahakikisha wanashinda mitaa yote na wagombea wao pamoja na wajumbe Ili kuhakikisha wanaongoza katika wilaya kwa kupata ushindi mkubwa.