Yanga yaendeleza ubabe kwa Simba, yaichapa goli mbili kwa bila

Ligi Kuu ya Vodacom (VPL) imeendelea leo jumamosi kwa michezo mitano huku mchezo ulivuta hisia za mashabiki wengi wa soka ukiwa ni pambano la watani wa jadi Yanga na Simba.

Katika mchezo huo ambao Yanga ilikuwa wenyeji umemalizika kwa Yanga kuendeleza ubabe kwa watani zao Simba baada ya kuwafunga goli mbili kwa bila na huku ikikumbukwa kuwa mchezo wa mzunguko wa kwanza Yanga iliibuka na ushindi sawa na ushindi wa leo.

Mchezo ulianza kwa timu zote kushambuliana kwa zamu huku Simba ikionekana kujisahau kwa kucheza faulo nyingi karibu na maeneo ya lango lao nao Yanga wakionekana kuwa wajanja kwa kutengeneza ukuta imara ambao washambuliaji wa Simba walishindwa kuupita.

Katika dakika ya 25, beki wa Simba, Abdi Banda alionyeshwa kadi nyekundu na mwamuzi wa mchezo huo, Jonesia Rukyaa baada ya kuonyeshwa kadi ya pili ya njano kwa kumchezea faulo mshambualiji wa Yanga, Donald Ngoma.

Dakika 10 mbele baada ya Banda kuonyeshwa kadi nyekundu, Yanga ilifanikiwa kupata goli kupitia kwa Donald Ngoma baada ya beki Hassan Kessy kurudisha mpira ambao hakuupiga kwa kasi kwa golikipa wa Simba, Angban na ndipo Ngoma alipouwahi kasha kumpiga chenga golikipa na kufunga goli ambalo lilidumu hadi mapumziko.

Kipindi cha pili mpira kilianza kwa timu zote kufanya mashambulizi ya kushtukiza na kurudi kulinda lango lao na katika dakika ya 72, Amissi Tambwe aliiandikia Yanga goli la pili nala ushindi ambalo lilidumu hadi mwamuzi, Jonesia Rukyaa anapiliza filimbi ya kumaliza mchezo huo.

Katika mchezo huo timu zote zilifanya mabadiliko kwa baadhi ya wachezaji ili kuona kama wanaweza kubadili hali ya mchezo ambapo kwa Simba walimtoa Mwinyikazimoto, Hamisi Kiiza na Ibrahim Hijib na nafasi zao kuchukuliwa na Nova Lufunga, Danny Lyanga na Brian Majwega.

Yanga wao walifanya mabadiliko kwa kumtoa Haruna Niyonzima na Deus Kaseke na nafasi kuchukuliwa na Simon Msuva na Godfrey Mwashiuya.

Vikosi:

Yanga: Barthez, Abdul, Bossou, Twite, Mgwali, Ngonyani, Kaseke, Kamusoko, Tambwe, Ngoma na Niyonzima.

Simba: Angban, Kessy, Tshabalala, Juuko, Banda, Majavi, Mkude, Kazimoto, Kiiza, Hijib na Ndemla.