DKT. HOMERA AKUTANA NA WAWEKEZAJI WA MRADI WA LNG

📌Asisitiza ushirikiano kufanikisha utekelezaji wake

Dar es Salaam

Waziri wa Nishati, Mhe. Dkt. Juma Zuberi Homera, amekutana na kufanya mazungumzo na viongozi wa kampuni za kimataifa zinazohusika na Mradi wa Kuchakata na Kusindika Gesi Asilia kuwa Kimiminika (LNG) utakaotekelezwa mkoani Lindi, ambapo amewahakikishia kuwa Serikali itaendelea kushirikiana na kampuni hizo ili kuhakikisha mradi huo wenye manufaa makubwa kwa Taifa unaanza kutekelezwa.Dkt. Homera amefanya mazungumzo hayo leo, Oktoba 22, 2026, katika Ofisi Ndogo za Wizara ya Nishati jijini Dar es Salaam, na viongozi wa kampuni hizo akiwemo Menno Bax, Mkurugenzi Mtendaji na Mwenyekiti wa kampuni ya Shell, pamoja na Hilde Merete Nafstad, Makamu wa Rais wa kampuni ya Equinor Tanzania.

Amesema Serikali inaendelea kufanya jitihada za kuhakikisha mradi huo unaanza kutekelezwa kwa kuwa ni miongoni mwa miradi muhimu itakayochangia upatikanaji wa nishati ya kutosha nchini, sambamba na kufanikisha malengo ya Dira ya Taifa ya Maendeleo 2050.

” Sote tunatambua umuhimu wa mradi huu kwa maendeleo ya nchi ikiwemo kupitia ukuaji wa viwanda, ajira, ukuzaji wa mapato ya nchi na huduma za kijamii kwa wananchi wanaozunguka eneo la mradi, hivyo lengo letu ni kuona unatekelezwa.” amesema Dkt. Homera

Aidha, amewataka wabia wa mradi huo kuhakikisha wananchi wanashirikishwa katika hatua mbalimbali za utekelezaji wake na kunufaika kupitia miradi ya maendeleo ya kijamii inayotekelezwa katika maeneo yanayozunguka mradi.

Katika hilo, amepongeza ujenzi wa Shule ya Msingi Likong’o iliyojengwa kwa ushirikiano wa kampuni za Shell, Equinor na Shirika la Maendeleo ya Petroli Tanzania (TPDC) katika Kijiji cha Likong’o mkoani Lindi, ambako mradi huo unatarajiwa kutekelezwa.

Kwa nyakati tofauti, viongozi wa kampuni za Shell na Equinor wameeleza kuwa kampuni hizo zitaendelea kushirikiana na Serikali katika hatua mbalimbali za maandalizi ya utekelezaji wa mradi huo, wakibainisha kuwa mradi una manufaa makubwa kwa Tanzania pamoja na kampuni zinazoshiriki katika uwekezaji huo.

Mradi wa LNG unaotarajiwa kutekelezwa mkoani Lindi unahusisha kampuni za kimataifa za Shell, Equinor, ExxonMobil, Pavilion Energy na MedcoEnergi, kwa kushirikiana na Serikali ya Tanzania kupitia TPDC, huku uwekezaji wake ukifikia Dola za Marekani bilioni 42.

  

MHE.NDEJEMBI: MRADI WA TAZA KUWA CHACHU YA MAENDELEO YA KIUCHUMI MIKOA YA KANDA ZA JUU KUSINI

📍 Akagua maendeleo ya ujenzi wa njia ya kusafirisha umeme TAZA Sumbawanga na Songwe

📍 Ataka wananchi kulinda miundombinu ya umeme iliyojengwa kwa gharama kubwa za Serikali

Na Mwandishi Wetu

Makamu wa Rais wa Jamhuri ya Muungano wa Tanzania, Mhe. Deogratius Ndejembi, amesema Mradi wa Kuunganisha Gridi za Umeme za Tanzania na Zambia (Tanzania–Zambia Interconnector Project – TAZA) ni uwekezaji muhimu utakaokuwa chachu ya maendeleo ya kiuchumi katika mikoa ya Nyanda za Juu Kusini kwa kuimarisha upatikanaji wa umeme wa uhakika, kuongeza uzalishaji na kufungua fursa mpya za uwekezaji.

Mhe. Ndejembi ameyasema hayo leo, Oktoba 15, 2026, wakati wa ziara ya kukagua maendeleo ya utekelezaji wa Mradi wa TAZA, ikiwemo miundombinu ya vituo vya kupokea na kupoza umeme vya Malangali mkoani Rukwa na Nkangamo mkoani Songwe.

Akizungumza katika Kituo cha Kupokea na Kupoza Umeme cha Malangali, Mhe. Ndejembi amesema Mkoa wa Rukwa umekuwa ukikabiliwa na changamoto ya upatikanaji wa umeme wa kutosha, hali inayoathiri shughuli za uzalishaji na ukuaji wa uchumi wa mkoa huo.

Ameeleza kuwa kwa sasa Mkoa wa Rukwa hupokea takribani megawati 16 za umeme, wakati mahitaji yake yakifikia megawati 30. Upungufu huo huathiri shughuli mbalimbali za kiuchumi, hususan uchakataji wa mazao ya kilimo, na kuwafanya baadhi ya wakulima kuuza mazao ghafi badala ya kuyasindika ili kuongeza thamani na kipato chao.

“Kwa maelekezo ya Rais wa Jamhuri ya Muungano wa Tanzania, Dkt. Samia Suluhu Hassan, ilielekezwa kuwa Mkoa wa Rukwa uunganishwe na Gridi ya Taifa ili kukabiliana na changamoto ya upatikanaji wa umeme. Ndiyo maana mradi huu ulianza kutekelezwa mwaka 2023,” amesema Mhe. Ndejembi.

Amesisitiza kuwa umeme wa uhakika ni msingi muhimu wa maendeleo, kwani utawezesha wananchi kupanua shughuli za biashara, kuanzisha viwanda, kuongeza thamani ya mazao ya kilimo na kuvutia wawekezaji, hatua zitakazochochea ajira na kuboresha maisha ya wananchi.

Mradi wa TAZA unahusisha ujenzi wa njia ya kusafirisha umeme wa msongo wa kilovoti 400 yenye urefu wa takribani kilometa 618 kutoka Iringa hadi Malangali mkoani Rukwa.

Akiwa katika Kituo cha Kupokea na Kupoza Umeme cha Nkangamo mkoani Songwe, ambacho ujenzi wake umefikia asilimia 83, Mhe. Ndejembi amesema mradi huo utasaidia kuondoa changamoto za muda mrefu za upatikanaji wa umeme na kuimarisha uwezo wa miundombinu ya nishati kukidhi mahitaji yanayoongezeka.

“Laini hii ina urefu wa kilometa 618 kutoka Iringa hadi Rukwa na inakwenda kuondoa kero ya muda mrefu ya changamoto ya umeme, huku ikifungua fursa zaidi za maendeleo ya kiuchumi,” amesema Mhe. Ndejembi.

Aidha, amesema nafasi ya Tanzania kijiografia inaipa fursa ya kuwa kiunganishi muhimu katika biashara ya umeme kati ya nchi za Afrika Mashariki na Kusini mwa Afrika. Kupitia Mradi wa TAZA, Tanzania itaimarisha uwezo wake wa kushirikiana na nchi jirani, ikiwemo Zambia, katika biashara ya nishati kupitia Mfumo wa Ushirikiano wa Umeme Kusini mwa Afrika (Southern African Power Pool – SAPP).

Mhe. Ndejembi amewataka wananchi kulinda miundombinu ya umeme inayojengwa kwa gharama kubwa za Serikali, akieleza kuwa miundombinu hiyo ni mali ya umma inayolenga kuboresha huduma za nishati, kukuza uchumi na kuleta maendeleo endelevu.

Utekelezaji wa Mradi wa TAZA ni sehemu ya jitihada za Serikali za kuimarisha Gridi ya Taifa, kupanua upatikanaji wa umeme wa uhakika na kutumia nishati kama kichocheo cha maendeleo ya viwanda, biashara, kilimo na uwekezaji nchini.

TANESCO KUONGEZA UWEZO WA UPATIKANAJI WA UMEME KATAVI DISEMBA 1,2026-MD TWANGE

📌Aeleza Mpanda itakuwa na jumla ya megawati 80 na kukidhi mahitaji ya juu ya Megawati 60 ya sasa

📌Asema Wananchi kunufaika na umeme wa uhakika na kuchochea shughuli za uzalishaji

Wananchi wa  Mpanda, Mkoani Katavi, wanatarajia kunufaika na upatikanaji wa umeme wa uhakika kufuatia mpango wa Shirika la Umeme Tanzania (TANESCO) kufunga transfoma mpya katika Mkoa wa Shinyanga ifikapo Disemba 1, 2026.

Hatua hiyo inalenga kuongeza uwezo wa kusafirisha umeme hadi megawati 80 Mpanda hali inayotarajiwa kuchochea shughuli za kiuchumi na kijamii.

Hayo yamesemwa Oktoba 13, 2026, mkoani Katavi, na Mkurugenzi Mtendaji wa TANESCO, Bw. Lazaro Twange, akitoa maelezo kwa Makamu wa Rais wa Jamhuri ya Muungano wa Tanzania, Mhe. Deogratius Ndejembi, aliyetaka kufahamu ni lini wananchi wa Mpanda watapata umeme wa uhakika. 

Bw. Twange amesema kuwa mahitaji ya juu ya umeme kwa wananchi wa Mpanda yanakadiriwa kuwa kati ya Megawati 53 na 60. Hivyo, kuongezeka Megawati  80 baada ya kifungwa transfoma hiyo kunatarajiwa kuwezesha kukidhi mahitaji hayo na kuwa na ziada ya takribani Megawati 20.

Akifafanua zaidi, Bw. Twange ameishukuru Serikali kwa uwekezaji katika miradi ya umeme na kueleza kuwa TANESCO inaendelea kuchukua hatua za kuimarisha upatikanaji wa umeme wa uhakika kwa wananchi katika maeneo mbalimbali.

“Kwanza tunaishukuru sana Serikali kwa uwekezaji mkubwa katika miradi ya umeme. Makadirio ya juu ya mahitaji ya umeme kwa wananchi wa Mpanda ni kati ya megawati 53 na 60. Nawahakikishia kuwa ifikapo Disemba 1, tutakuwa tayari tumefunga transfoma ya Mva  150 itakayokuwa na uwezo wa kuwezesha kupeleka jumla ya megawati 80 za umeme,” amesema Bw. Twange.

Utekelezaji wa hatua hiyo unatarajiwa kuimarisha upatikanaji wa umeme katika mji wa Mpanda na kusaidia shughuli za uzalishaji, biashara na huduma za kijamii, ambazo zinategemea nishati ya umeme.

WAZIRI DKT HOMERA AZINDUA MIFUMO ITAKAYOWEZESHA WANANCHI KUPATA HUDUMA ZA UMEME KWA HARAKA NA URAHISI

📌Aipongeza TANESCO kwa kutekeleza maono ya Rais. Dkt. Samia  ya kutumia ubunifu katika kuhudumia wananchi.

Waziri wa Nishati, Mhe. Dkt. Juma Zuberi Homera, amezindua mifumo mipya ya kuhudumia wateja wa Shirika la Umeme Tanzania (TANESCO) pamoja na Mkataba wa Huduma kwa Wateja ulioboreshwa, ikiwa ni hatua inayolenga kuhakikisha wateja wakubwa na wadogo wa Shirika hilo wanapata huduma kwa haraka na urahisi.

Akizindua mifumo hiyo jijini Dar es Salaam tarehe 6 Oktoba 2026, Dkt. Homera amesema TANESCO imeonesha dhamira ya kupiga hatua zaidi katika kuboresha huduma kwa wateja, akieleza kuwa hatua hiyo ina umuhimu mkubwa katika maslahi ya Taifa, hususan katika utekelezaji wa Dira 2050 na maono ya Rais, Mhe. Dkt. Samia Suluhu Hassan, ya kuhakikisha taasisi zinatumia ubunifu na teknolojia katika kuboresha huduma kwa wananchi.

Mifumo aliyoizindua ni pamoja na 'Twiga Assistant' suluhisho la kisasa linalotumia akili mnemba (AI) na kumwezesha mteja kupata huduma saa 24 kwa siku bila kulazimika kupiga simu TANESCO na  'Twiga Premium Portal' jukwaa maalum la kidijitali litakalowawezesha wateja wakubwa kupata huduma mbalimbali kwa urahisi zaidi.

Aidha, Dkt. Homera amezindua namba maalum 185 kwa ajili ya wateja wakubwa, itakayowawezesha kupata huduma za haraka, za moja kwa moja na zenye kipaumbele pamoja na uzinduzi wa Kitengo cha Huduma kwa Wateja Wakubwa ili kuhakikisha kundi hilo linapata huduma zinazokidhi mahitaji yake.

Pamoja na kuipongeza TANESCO kwa ubunifu huo uliofanywa na wataalamu wa ndani, Dkt. Homera amelitaka Shirika hilo kuhakikisha Mkataba wa Huduma kwa Wateja unatekelezwa kwa vitendo katika ngazi zote na ahadi zilizomo ndani yake zinakuwa sehemu ya utamaduni wa kazi wa kila mtumishi. Pia, amesisitiza mifumo yote iliyozinduliwa ifanye kazi kwa ufanisi muda wote na itumike kwa vitendo ili kuleta matokeo yaliyokusudiwa kwa wananchi.

Vilevile, ameelekeza TANESCO kutoa elimu ya kutosha kwa makundi yote ya wateja kuhusu mifumo hiyo na namna ya kuitumia kupata huduma na kutatua changamoto mbalimbali. 

Ameitaka pia TANESCO kuongeza matumizi ya takwimu na maoni ya wateja katika kufanya maamuzi, huku kila lalamiko la mteja likitumika kama fursa ya kuboresha huduma.

Aidha, amesisitiza umuhimu wa kulinda taarifa za wateja na mifumo ya kidijitali kwa kuzingatia sheria na viwango vya usalama wa taarifa, sambamba na kukiwezesha kikamilifu Kitengo cha Huduma kwa Wateja Wakubwa kutoa huduma bora na kwa wakati.

Katika hatua nyingine, Dkt. Homera amesema uwekezaji unaofanywa na Serikali katika Sekta ya Nishati umeendelea kuimarisha upatikanaji wa umeme wa uhakika nchini, ambapo uwezo wa kuzalisha umeme umefikia MW 4,606, sawa na ongezeko la asilimia 21.32, huku mahitaji ya juu ya umeme yakifikia MW 2,316, ikiwa ni ongezeko la asilimia 12.97 ikilinganishwa na mwaka 2025.

Amesema ongezeko hilo la mahitaji ya umeme linaenda sambamba na kuongezeka kwa idadi ya wateja wanaohitaji kuhudumiwa, hivyo mifumo hiyo mipya itachangia utekelezaji wa malengo ya Serikali, ikiwemo Dira ya Taifa ya Maendeleo 2050 inayotambua nishati kuwa kichocheo muhimu cha ukuaji wa uchumi na maendeleo ya nchi.

Katika hafla hiyo, Dkt. Homera amesisitiza utekelezaji wa maelekezo ya Rais, Mhe. Dkt. Samia Suluhu Hassan ya kuhakikisha Tanzania inafikia uwezo wa kuzalisha megawati 8,000 ifikapo mwaka 2030 akieleza kuwa lengo hilo linawezekana kutokana na Wizara na taasisi zake, ikiwemo TANESCO, kuwa na wataalamu wanaofanya kazi kwa weledi, sambamba na kuendelea kwa utekelezaji wa miradi mbalimbali ya umeme, ukiwemo Mradi wa Umeme wa Jua wa Kishapu ambao awamu yake ya pili inahusisha  MW 100

Kwa upande wake, Katibu Mkuu wa Wizara ya Nishati anayeshughulikia Mafuta na Gesi Asilia, Dkt. James Mataragio, amesema huduma zilizozinduliwa, zikiwemo Twiga AI Chatbot, Twiga Premium Customer Portal, Premium Customers Toll Free Line, Premium Customer Service Section  pamoja na Mkataba wa Huduma kwa Wateja ulioboreshwa, zinaendana na dhamira ya Serikali ya kuhakikisha kuwa pamoja na kuimarisha upatikanaji wa umeme nchini, huduma zinazotolewa kwa wananchi zinaendelea kuboreshwa kupitia teknolojia, ubunifu na mifumo ya kisasa.

MAKAMU WA RAIS ASHUHUDIA MPANGO WA UFADHILI WA UUNGANISHAJI UMEME " KILA NYUMBA ITAWAKA

DAR ES SALAAM

Makamu wa Rais wa Jamhuri ya Muungano wa Tanzania, Mhe. Deogratius Ndejembi, ameshuhudia uzinduzi wa Mpango wa Ufadhili wa Uunganishaji Umeme kwa Wananchi unaotekelezwa kwa ushirikiano kati ya Shirika la Umeme Tanzania (TANESCO) na Benki ya CRDB, ukiwa na lengo la kuongeza kasi ya wananchi kupata huduma ya umeme nchini.

Mhe. Ndejembi ameshuhudia uzinduzi wa mpango huo leo katika Kituo cha Mikutano cha Kimataifa cha Julius Nyerere (JNICC) jijini Dar es Salaam, unaotekelezwa chini ya kaulimbiu “Kila Nyumba Itawaka – Tumekufikia, Tutakulipia na Utalipa Kidogo Kidogo,” akisema ushirikiano huo ni mfano wa namna Serikali na sekta binafsi zinavyoweza kuunganisha nguvu na rasilimali katika kutatua changamoto zinazowagusa wananchi moja kwa moja.

Kupitia mpango huo, wananchi wa maeneo ya vijijini watawezeshwa kuunganishiwa umeme kwa kupata ruzuku ya Shilingi 27,000 kwa kila kaya kutoka CRDB, ambayo si mkopo. Kwa upande wa wananchi wa maeneo ya mijini, watapata fursa ya kuunganishiwa umeme kwa mkopo kuanzia Shilingi 320,000 wenye riba nafuu.

Mhe. Ndejembi amesema mpango huo ni sehemu ya utekelezaji wa Mission 300, inayolenga kuongeza kasi ya upatikanaji wa umeme barani Afrika, huku Tanzania ikiwa na lengo la kuwaunganisha watu milioni 8.5 na huduma ya umeme kati ya mwaka 2025 na 2030, sawa na kuwafikishia huduma hiyo takribani watu milioni 1.7 kwa mwaka.

“Miradi kama hii ni muhimu katika kuhakikisha malengo hayo yanafikiwa kwa ufanisi. Kupitia makubaliano haya, CRDB imejiwekea lengo la kufikisha huduma ya uunganishaji umeme kwa kaya 500,000 kwa mwaka,” amesema.

Akizungumzia umuhimu wa huduma hiyo, Mhe. Ndejembi amesema umeme ni msingi wa maendeleo ya mtu mmoja mmoja, familia na Taifa, akieleza kuwa mtoto anahitaji mwanga ili aweze kusoma, mkulima anahitaji umeme kuongeza thamani ya mazao yake, kijana anahitaji nishati kuwezesha ubunifu na teknolojia, huku mfanyabiashara akihitaji umeme kuongeza tija na kuchangia ukuaji wa uchumi.

“Hakuna Mtanzania anayepaswa kubaki nyuma kwa kukosa huduma ya msingi ya umeme,” amesema.

Aidha, Makamu wa Rais ameiagiza TANESCO kwa kushirikiana na CRDB kufanya tathmini ya matokeo ya mpango huo, kutoa elimu kwa wananchi kuhusu gharama na masharti ya huduma hiyo, pamoja na kuhakikisha utekelezaji unaanza mara moja.

Mpango huo unatekelezwa chini ya kaulimbiu “Kila Nyumba Itawaka – Tumekufikia, Tutakulipia na Utalipa Kidogo Kidogo,” ikisisitiza dhamira ya kuwezesha wananchi kupata huduma ya umeme kwa urahisi na kwa masharti nafuu.

WIZARA YA NISHATI YATWAA TUZO YA WIZARA BORA KWA UTENDAJI MEL 2026

Na Mwandishi Wetu - Arusha


Wizara ya Nishati imeibuka kinara kwa kutwaa Tuzo ya Wizara Bora kwa Utendaji (Best Performing Ministry Award) katika eneo la Ufuatiliaji, Tathmini na Kujifunza (MEL), katika Kongamano la Tano la Kitaifa la Ufuatiliaji, Tathmini na Kujifunza (MEL 2026) linaloendelea jijini Arusha.


Tuzo hiyo imekabidhiwa tarehe 23 Septemba 2026 na Naibu Spika wa Bunge, Mhe. Daniel Sillo (Mb), wakati wa ufunguzi rasmi wa Kongamano la Tano la Kitaifa la Ufuatiliaji, Tathmini na Kujifunza (MEL 2026).


Tuzo hiyo inaitambua Wizara ya Nishati kwa utendaji na matumizi ya mifumo ya Ufuatiliaji na Tathmini katika kuimarisha utekelezaji wa mipango, programu na miradi ya Sekta ya Nishati.


Akizungumza kuhusu
mafanikio hayo, Mkurugenzi wa Kitengo cha Ufuatiliaji na Tathmini wa Wizara ya Nishati, Bi. Anitha Ishengoma, amesema Wizara inajivunia kutambuliwa kwa juhudi na mafanikio yake katika eneo la Ufuatiliaji na Tathmini, jambo linalodhihirisha dhamira ya Wizara katika kuimarisha utendaji unaozingatia ushahidi na matokeo.


“Tunajivunia kuona juhudi na mafanikio ya Sekta ya Nishati katika Ufuatiliaji na Tathmini yakitambuliwa kwa kutunukiwa Tuzo ya Sekta Bora kwa Utendaji 2026. Tuzo hii ni matokeo ya kazi ya pamoja, uwajibikaji, ushirikiano na kujituma kwa Wizara ya Nishati pamoja na Taasisi zilizo chini yake,” amesema Bi. Ishengoma.


Amefafanua kuwa mafanikio hayo yanaakisi dhamira ya Wizara ya kuendelea kutumia Ufuatiliaji na Tathmini kama nyenzo muhimu ya kusimamia utendaji, utekelezaji wa mipango, programu na miradi, pamoja na kuwezesha ufanyaji wa maamuzi unaozingatia ushahidi na matokeo.


“Tunatoa shukrani kwa uongozi, watumishi na wadau wote waliochangia kufanikisha mafanikio haya. Tuzo hii si mwisho wa safari, bali ni chachu ya kuongeza kasi, ubora, uwajibikaji na kuleta matokeo yenye tija katika Sekta ya Nishati kwa manufaa ya wananchi,” amesisitiza Bi. Ishengoma