Mkuu wa Wilaya ya Ikungi Mhe Miraji Jumanne Mtaturu
Na Mathias Canal, Singida
Kivumbi
cha Mashindano ya ligi ya mpira wa miguu Wilayani Ikungi Mkoani Singida
Maarufu kama “IKUNGI ELIMU CUP 2017” kinataraji kuanza kurindima
Wilayani Ikungi Siku ya Jumamosi Agosti 19 huku mashindano hayo yakiwa
na dhamira ya kuwafikia zaidi ya wananchi 5000 katika Wilaya hiyo.
Mashindano
hayo yatakayofunguliwa na Mgeni rasmi ambaye ni Mkuu wa Mkoa wa Singida
Mhe Dkt Rehema Nchimbi na kuzikutanisha timu mbalimbali kutoka Kata
zote 28 na vijiji 101 katika Wilaya ya Ikungi huku yakiongozwa na kauli
mbiu ya “ Changia, Boresha Elimu Ikungi”.
Ufunguzi
wa mashindano hayo utafanyika siku ya Jumamosi kuanzia saa tano asubuhi
katika Uwanja wa Shule ya Sekondari Ikungi ambapo mechi ya ufunguzi
itakuwa ni kati ya timu ya Kata ya Ikungi na Timu ya Kata ya Puma ambapo
kabla ya kufunguliwa kwa mashindano hayo kutakuwa na mchezo dhidi ya
Madiwani wa Halmashauri ya Manispaa ya Singida waatakaovaana vikali na
Madiwani wa Halmashauri ya Wilaya ya Ikungi.
Katika
mchezo huo wa awali Timu ya Madiwani kutoka Halmashauri ya Manispaa ya
Ikungi itaongozwa na Mkuu wa Wilaya ya Ikungi Mhe Miraji J. Mtaturu huku
timu ya Madiwani wa Halmashauri ya Manispaa ya Singida ikiongozwa na
Mkuu wa Wilaya ya Singida Mhe Elias Tarimo.
Katika
ufunguzi wa mashindano hayo kutakuwa na zoezi la uanzishwaji rasmi wa
zoezi la ufyatuaji matofali kila Kata ambapo zaidi ya matofali 300,000
yanahitajika ikiwa ni sehemu ya kuhimiza utatuzi wa Changamoto
mbalimbali Wilayani Ikungi ikiwemo Upungufu wa nyumba za walimu, Vyumba
vya madarasa, Ofisi za walimu, Maabara, Thamani mbalimbali, Matundu ya
vyoo vya walimu na wanafunzi.
Akizungumza
na mtandao wa www.wazo-huru.blogspot.com Mkuu wa Wilaya ya Ikungi Mhe
Miraji Jumanne Mtaturu alisema kuwa katika ufunguzi wa mashindano hayo
pia kutakuwa na zoezi la kukabidhi zawadi kwa shule ya sekondari Ikungi
iliyofanya vizuri katika matokeo ya kidato cha sita na kupelekea
kuongoza kikanda kwa wanafunzi 16 kupata Daraja la kwanza.
Alisema
kuwa aliwapa motisha wanafunzi kwa kuwaahidi kumpatia shilingi 100,000
kwa kila mwanafunzi atakayefanya vizuri katika matokeo yake hivyo
utekelezwaji wa ahadi hiyo utafanyika siku ya ufunguzi wa mashindano
hayo.
Aidha, zawadi zingine
zitakazotolewa itakuwa ni kuwapa kila mwalimu takribani shilingi milioni
moja kwa ajili ya kuakisi ufanisi wao kwa kuwafundisha wanafunzi kwa
weledi mkubwa na hatimaye kuwa na matokeo mazuri.
Kuanza
kwa mashindano hayo ya “IKUNGI ELIMU CUP 2017” ni utekelezaji wa Wazo
la kuanzisha Mfuko wa Elimu lilitokana na kikao cha wadau wa elimu
kilichoitishwa na Mkuu huyo wa Wilaya mwezi Disemba, 2016 na kubaini
changamoto zinazoikabili sekta ya elimu ikiwemo kushuka kwa ufaulu wa
wanafunzi kuanzia elimu ya msingi mpaka Sekondari.
Katika
Kikao hicho kuliadhimiwa maazimio 43 ambayo yalizaa wazo la kuanzisha
mfuko wa elimu ambapo wazo hilo lilifikishwa kwenye baraza la madiwani
na kupokelewa kwa kauli moja ndipo mwezi Aprili mwaka 2017 baraza
liliridhia kuanzishwa mfuko na kuteua wajumbe 15 wa bodi ya mfuko wa
elimu wa Wilaya ya Ikungi.
Jumla ya
fedha taslimu shilingi bilioni 3 zinahitajika kwa mpango mkakati wa
miaka mitatu kwa mtazamo wa Shule zenye hali mbaya zaidi ambapo wadau
wanaombwa kuchangia mfuko ikiwemo Halmashauri ya Wilaya ya Ikungi
kuchangia 3% ya mapato yake ya ndani.
EmoticonEmoticon