WALIMU WAKUU WA SHULE ZA SEKONDARI NA MSINGI WATAKAOKUTWA NA WANAFUNZI HEWA KUKIONA

KATIBU Tawala wa wilaya ya Tanga (DAS),Faidha Salim amesema wilaya hiyo itawachukulia hatua kali za kisheria walimu wakuu wa shule za msingi na sekondari ambao watabainika shule zao kuwa na wanafunzi hewa wanaoingizwa kwenye bajeti ya mgao wa fedha zinazotolewa kutoka serikali .

Faidha aliyasema hayo jana wakati akizungumza na Tanga Raha blog katika mahojiano maalumu kuhusu hatua ambazo watazichukua kwa shule ambazo zitabainika kuwa na wanafunzi hewa kutokana na agizo la Rais Magufuli la kutaka kuwepo uhakiki huo ili kuona fedha zinazotumika kihalali.

Alisema kuwa kwa wilaya ya Tanga tayari walikwisha kuanza mchakato huo wa uhakiki kwa kutoa fomu ambazo zitapelekwa kwenye shule zote ili kuweza kubainika uwepo wa wanafunzi hewa ambao waliingizwa kwenye mgao wa fedha zinazotolewa na serikali.

“Unajua hivi sasa tunachokifanya sisi kama wilaya ya Tanga kwa kushirikiana tumeanza mchakato huo wa uhakiki hivyo tunachokifanya hivi sasa ni kupata idadi kamili ya wanafunzi na fedha kiasi gani ambacho kilipelekwa ili kujua hatua za kuchukua”Alisema.

“Kama ujuavyo katika wilaya ya Tanga tuna shule za serikali za sekondari 26 na za msingi 79 hivyo tunachokifanya ni kutoa fomu hizo na baadae watapata maelezo kutoka kwa walimu wakuu ambao watabainika kuna wanafunzi hewa kwanini wanawapokea wanafunzi hewa wakati wanajua kufanya hivyo ni kosa kisheria “Alisema.

Aidha alisema kuwa shule ambazo zitabainika kuwepo kwa wanafunzi hewa walimu wakuu watashughuliwa kwa mujibu wa sheria zilizopo kutokana na kuisababishia hasara serikali kwa kutoa fedha ambazo zinapotea.

Katika hatua nyengine,Katibu Tawala huyo alisema kuwa hivi sasa wilaya ya Tanga inaendelea na mchakato wa uhakiki wa watumishi hewa na wamekwisha kufikia asilimia 50 hivyo wanatarajia kukamilisha kazi hiyo mwishoni mwa mwezi huu.