Mkuu wa Biashara kanda ya Nyanda
za juu kusini Bw. Juvenal Utafu akiwasihi wanafunzi ( hawapo pichani)
kutumia vema mtandao uliotolewa na TTCL kwa manufaa ya elimu na si
vinginevyo. Kushoto ni Bw. Nasibu Mengele aliyemwakilisha Afisa Elimu
mkoa wa Iringa Bw. Eusedius Mtavangu kulia ni Meneja wa TTCL Iringa Bw.
Humprey Ngowi.
Baadhi ya wafanyakazi wa TTCL
waliohudhuria katika hafla ya makabidhiano hayo. Kutoka kulia ni meneja
msaidizi (biashara) Bw. John Ngh’onoli, Meneja msaidizi (mtandao) Amani
Kichele, afisa Utawala Bw. Silas Hokororoni na mratibu wa biashara kanda
ya Nyanda za juu kusini Bw. Ephraim Vitalis .
Kutoka kushoto ni Mkurugenzi wa
ICT, chuo kikuu Iringa Bw. Frederick Ngumbuke, Meneja maktaba kutoka Mt.
Maiko sekondari Bw. Denis Mwamlima, Mkaguzi wa shule za sekondari kanda
ya Nyanda za juu kusini Bw. Kadius Kiwanga. Wengine ni Mwakilishi wa
diwani wa kata ya Gangilonga Bi. Maria Gotfried Sangana, Mchungaji
Andendekisye M. Ngogo, mkuu wa shule ya sekondari Image, mwakilishi wa
BAKWATA mkoa wa Iringa Sheikh Issa Said Gwere na Mchungaji Breyson M.
Mbogo kutoka kanisa la Kilutheri Tanzania dayosisi ya Iringa.
Askofu mkuu wa jimbo la Iringa
Tarcisius J. Ngalalekumtwa (kulia)akipokea moja ya komputa zilizotolewa
na TTCL kutoka kwa Rais wa Global Outreach Tanzania Bw. Lucas
Mwahombela. Askofu huyo amesaidia kutoa majengo ambayo ndiyo yanatumika
kama maktaba ya Global Outreach bila malipo yoyote.
Picha ya pamoja .
…………………………………..
Kampuni ya simu Tanzania imetoa
msaada wa komputa kumi pamoja na kifurushi cha internet ya bure yenye
kasi ya 2Mbps kwa muda wa miezi sita kwa kituo cha Global Outreach
Tanzania vyote vikiwa na thamani ya shilingi milioni ishirini laki moja
na tisini na saba elfu mia sita ( Tshs.20, 197,600/=) ili kuendeleza
juhudi zinazofanywa na Serikali na wadau wengine katika kuboresha mfumo
wa elimu yetu kwa ajili ya maendeleo ya taifa letu.
Akiongea wakati wa kukabidhi komputa hizo kwa niaba ya afisa
Mtendaji mkuu wa TTCL Dr. Kamugisha Kazaura, Mkuu wa biashara kanda ya
Nyanda za juu kusini Bw. Juvenal Utafu ameipongeza Global Outreach
Tanzania kwa kuanzisha mchakato huu wa kuinua elimu kupitia Teknolojia
ya Habari na Mawasiliano(TEHAMA) ili kuendana na wakati na kuwafikia
walengwa wengi kwa gharama nafuu na anaamini juhudi zao zitasaidia
kujenga jamii yenye maarifa( knowledge society) katika zama hizi za
uchumi maarifa (knowledge economy) na hivyo kuchangia katika juhudi za
serikali kufikia malengo yake hasa katika kuleta maendeleo ya haraka kwa
kwa wananchi wake wa kada mbalimbali.
Aidha Bw. Utafu amewaasa wanafunzi
waitumie huduma hiyo ya internet kwa malengo yaliyokusudiwa. Waachane
na matumizi mengine yasiyo na tija ambayo yanapatikana kwenye internet
kutokana na maendeleo ya sayansi na teknolojia.
Aliongeza kuwa TTCL kwa sasa iko
kwenye utekelezaji wa mabadiliko ya kibiashara na teknolojia kwa lengo
la kuporesha huduma zake kwa wateja; wanatarajia ifikapo mwishoni mwa
mwezi Septemba mwaka huu kuingia kwenye teknolojia ya GSM na LTE ili
kuboresha utoaji wa huduma za simu za mkononi/kiganjani, simu za mezani
na huduma za data nchi nzima hivyo Wananchi na taasisi mbalimbali
watarajie kupata huduma nyingi na bora zikiwemo kutuma na kupokea fedha
na vifurushi vya intanet yenye kasi kubwa.
Naye mgeni rasmi katika hafla hiyo
Bw. Nasibu A. Mengele aliyemwakilisha Afisa Elimu Mkoa wa Iringa Bw.
Eusedius Mtavangu ameishukuru TTCL kwa juhudi zake za kuinua sekta ya
elimu pamoja na sekta nyingine pia. Jambo hili ni mfano wa kuigwa kwa
makampuni mengine, sisi serikali tunatambua mabadiliko na ukuwaji wa
teknolojia kwa kasi ambao si budi kwa Tanzania- tukiwemo wana Iringa,
tukajiandaa vyema ili kukabiliana na maendeleo hayo ili tusibaki nyuma.
Global Outreach Tanzania inasaidia shule 13 na inatoa elimu ya
komputa bure kwa wakuu wa shule, wasimamizi wa maktaba za komputa na
walimu kwa ujumla. Mpaka sasa zaidi ya walimu 500 na wanafunzi 5000
wamenufaika na mafunzo hayo.