CCM TANGA WAMSHUKURU MBUNGE UMMY MWALIMU KWA KUWEKEZA KWA VIJANA KUPITIA MICHEZO

Na Oscar Assenga,Tanga. 

Katibu wa Chama Cha Mapinduzi (CCM) Wilaya ya Tanga, Shabani Hamisi, amemshukuru Mbunge wa Jimbo la Tanga Mjini, Ummy Mwalimu, kwa kuandaa mashindano ya Oddo Ummy Cup kwa kushirikiana na chama cha mpira mkoa wa Tanga (TRFA) akisema kuwa ni hatua muhimu katika kukuza vipaji vya vijana jijini humo.

Akizungumza kama mgeni rasmi kwenye fainali ya mashindano hayo, Hamisi alisema kuwa michezo ni ajira kwa vijana kama zilivyo ajira nyingine, na ni njia mojawapo ya kuimarisha mahusiano na kuwaepusha na vitendo viovu.

"Kwa niaba ya Mheshimiwa Mbunge, nipo hapa kama mgeni rasmi kuhakikisha kuwa mashindano haya yanakuwa chachu kwa vijana katika kujikwamua kiuchumi. Michezo ni ajira, na pia ni njia bora ya kujenga nidhamu na mahusiano bora katika jamii," alisema.

Aidha Alisema kuwa Ummy Mwalimu amekuwa mstari wa mbele kuhakikisha vijana wa Tanga wanashiriki katika michezo mbalimbali na kutumia fursa zinazojitokeza. Alisisitiza kuwa mbunge huyo yuko tayari kushirikiana na vijana katika nyanja tofauti ili kuwawezesha kufikia ndoto zao.

Kwa upande wake, Mwenyekiti wa Chama cha Soka Mkoa wa Tanga (TRFA), Martin Kibua, aliwataka wachezaji na makocha kuzingatia sheria za mchezo, huku akipiga marufuku wachezaji kuhama hama katika timu bila kufuata utaratibu rasmi.

Katibu wa Mbunge wa Jimbo la Tanga Mjini, Hassan Nyelo, alieleza kuwa ligi ya mwaka huu imekuwa ya kihistoria kutokana na udhamini mkubwa uliotolewa na Mbunge huyo, ikiwa ni mara ya kwanza kwa ligi ya wilaya kupata udhamini wa asilimia 100, ikijumuisha michezo 98 na zawadi zote.

"Mheshimiwa Mbunge amekuwa akiunga mkono jitihada za Rais Dkt. Samia Suluhu Hassan, hasa katika sekta ya michezo. Ameahidi kuendeleza juhudi hizi kwa michezo mingine zaidi baada ya mpira wa miguu," aliongeza.

Nyelo alihitimisha kwa kuwaomba vijana na wakazi wa Tanga kuendelea kumuunga mkono Mhe. Oddo Mwalimu kwa juhudi zake za kukuza maendeleo ya vijana kupitia michezo.

MILIONI MBILI ZA MBUNGE UMMY MWALIMU ZILIVYOCHOCHEA USHINDI WA COASTAL UNION

Na: Mwandishi Wetu, Tanga

Ahadi ya Milioni Mbili iliyoahidiwa na Mbunge wa Jimbo la Tanga Mjini (CCM), Ummy Mwalimu, kwa Timu ya Coastal Union endapo itapata ushindi katika mchezo wao dhidi ya Singida Black Stars, imekuwa chachu ya kuchochea ushindi mara baaada ya kuibuka na ushindi wa mabao mawili kwa moja (2-1) katika mechi iliyochezwa Aprili 10, 2025, katika viwanja ya CCM Mkwakwani jijini Tanga.

Ummy Mwalimu ambaye ni mdau mkubwa wa michezo mkoani Tanga, alipata wasaa wa kuongea na wachezaji wa Timu ya Coastal Union kabla ya mchezo huo. 

Kimsingi, Ummy Mwalimu aliwasisitiza wachezaji hao kupambana kwa jasho na damu ili kupata ushindi huku akisisitiza kuwa atawakabidhi kitita cha Milioni Mbili mara baada ya kumalizika mchezo huo endapo wataibuka na alama tatu muhimu katika mchezo huo.

Kufuatia ushindi wa (2-1), Ummy Mwalimu alitimiza ahadi yake hiyo kwa kuwakabidhi wachezaji hao fedha taslimu Milioni Mbili, ambapo viongozi na wachezaji wa Coastal Union walimshukuru kwa kutimiza ahadi yake ambayo imewapa nguvu ya kupambana katika mchezo huo katika michezo inayofuata pia.

Hii si mara ya kwanza kwa Ummy Mwalimu kuwaunga mkono Timu ya Coastal Union, amekuwa akifanya hivyo mara kadhaa kuhakikisha Timu hiyo inafanya vizuri ili kuuheshimisha mkoa wa Tanga kimichezo hasa katika mchezo wa mpira wa miguu.

TETE FOUNDATION YAGAWA MAHITAJI /VIFAA VYA SHULE KWA WANAFUNZI WALIOPO KATA YA MIONO,CHALINZE -PWANI KWA MWAKA 2025

TETE FOUNDATION kupitia mradi wake wa “TUNAAMINI KATIKA WEWE” wamekuwa wakigawa mahitaji/vifaa vya shule kwa watoto wanaoishi kwenye mazingira magumu na wenye uhitaji maalumu kwa kuhakikisha mtoto hakosi shule mwaka mzima kwa sababu ya kutokuwa na mahitaji ya shule (Sare za shule, madaftari, Begi, viatu n.k)......

Mradi huu wa “Tunaamini katika wewe” unao  dhaminiwa na Kampuni ya Reliance Insurance kwa takribani miaka mitatu sasa, umeongeza ufaulu wa watoto mashule na kupunguza utoro mashuleni 

Zoezi hili la ugawaji wa mahitaji ya shule ulienda sambamba na Bonanza la Michezo lililojumuisha shule za msingi na Sekondari zilizopo katika kata ya Miono lililokuwa na dhumuni la kuwaleta watoto pamoja ili kuweza kutambuana na kushirikiana kwenye masomo ili kukuza ufaulu mashuleni

Imetolewa

Afisa Habari

WATANZANIA KUNUFAIKA NA MASHINDANO YA CHAN 2025,AFCON 2027

*📌 Mashindano yameipa heshima Tanzania kimataifa*

*📌 Rais Samia kinara wa Michezo nchini*

*Na Ofisi ya Naibu Waziri Mkuu na Waziri wa Nishati*

Watanzania watanufaika na fursa mbalimbali za kiuchumi na kijamii zitakazopatikana kuelekea katika mashindano wa CHAN 2025 na AFCON 2027.

Hayo yamebainishwa leo Januari 15, 2025 na Naibu Waziri Mkuu na Waziri wa Nishati, Mhe. Dkt. Doto Biteko wakati akifungua Kongamano la Wadau wa Michezo kuelekea CHAN 2025 na AFCON 2027 jijini Dar es Salaam. 

"Nchi yetu imepata heshima kubwa kimataifa na hii haiji kwa bahati mbaya imesababishwa na ukuaji wa demokrasia iliyojengwa na Rais Samia kwenye mataifa mbalimbali duniani," amesema Dkt. Biteko.

Aidha, Dkt. Biteko amewapongeza wadau wa michezo waliotoa mawazo ya kuanzishwa kwa kongamano hilo ili kutangaziana fursa zitakazotokea wakati wa mashindano hayo. 

Ameeleza kuwa, mashindano yatawakutanisha wageni wengi kutoka mataifa mbalimbali na kuna wajibu wa kufanya maandalizi kwa ufanisi mkubwa ili kunufaika na mashindano kupitia fursa mbalimbali za usafirishaji, malazi na burudani. 

"Fursa za mashindano haya zitakuza uchumi wa nchi yetu na kufanya vikundi vya watu au kampuni mbalimbali kufanya biashara na kukuza uchumi wao na hatimaye kuondoa umaskini miongoni mwetu," ameongeza Dkt. Biteko. 

Vile vile, Dkt. Biteko amempongeza Rais Samia kwa kuwa kinara wa kuhamasisha ushiriki wa watanzania katika sekta ya michezo ili vijana kukuza uchumi wao. 

Kwa upande wake, Naibu Waziri wa Habari, Utamaduni, Sanaa na Michezo Mhe. Hamis Mwijuma amesema lengo la kongamano ni kupokea maoni ya wadau mbalimbali na kuchanganua fursa zitakazokuja pamoja kuelekea mashindano ya CHAN 2025 na AFCON 2027 ambazo watanzania watanufaika nazo.

Mashindano ya CHAN 2025 yanatarajiwa kufanyika mwezi Agosti mwaka huu na AFCON yamepangwa kufanyika mwaka 2027.

UDSM MARATHON KUBORESHA MAISHA YA WANAFUNZI

📌 Dkt. Biteko Ahimiza Wadau Kuchangia Ujenzi wa Kituo cha Wanafunzi

📌Awashukuru Wadhamini wa UDSM Marathon

Na Ofisi ya Naibu Waziri Mkuu na Waziri wa Nishati

Naibu Waziri Mkuu na Waziri wa Nishati, Mhe. Dkt. Doto Biteko ameeleza amefurahishwa kwake na uendeshaji wa UDSM Marathon na kusema kuwa inasaidia kufanikisha malengo ya Chuo Kikuu cha Dar es Salaam kuendelea kutoa elimu bora na kuboresha mazingira ya wanafunzi.

Dkt. Biteko amesema hayo leo Desemba 7, 2024 mara baada ya kushiriki mbio hizo za Chuo Kikuu cha Dar es Salaam (UDSM MARATHON) zilizofanyika chuoni hapo.

“ Ni dhahiri kwamba mbio hizi zimekuwa muhimu kwa Chuo hiki na jamii kwa ujumla. Tukio hili limeleta pamoja wadau mbalimbali na kuchangia kwa kiasi kikubwa katika juhudi za kuboresha mazingira ya kujifunzia na kufundishia,” amesema Dkt. Biteko.

Ameongeza “Natambua kwa misimu mitano mbio hizi zimekua zikichangia katika ujenzi wa Kituo cha Wanafunzi kinachojengwa hapa katika Kampasi Kuu ya Mwalimu Nyerere Mlimani. Ujenzi wa kituo hiki ulianza kwa michango kutoka kwa wahitimu wa Chuo Kikuu cha Dar Es Salaam na washirika mbalimbali wa maendeleo ya elimu ambapo jumla ya shilingi bilioni 4.4 zimechangwa kutoka kwa wadau.”

Aidha, awamu ya kwanza ya ujenzi imekamilishwa kwa kutumia fedha za ndani  na hivyo kazi kubwa iliyobaki ni kukamilisha awamu ya pili ili kutimiza ndoto ya kuwa  na Kituo cha Wanafunzi  kitakachowezesha wanachuo kuwa na maeneo ya kujifunzia na  kupata nafasi ya kukuza vipaji vyao.

Ujenzi wa awamu ya pili unahitaji shilingi bilioni 3.3 na hivyo kufanya gharama za ujenzi kwa awamu hiyo kufikia shilingi bilioni 9.4 badala ya shilingi bilioni 6 zilizokadiriwa awali ambazo zimebadilika kwa sababu mbalimbali.

Akiwahakikishia ushiriki wake katika kufanikisha ukamilishaji wa ujenzi wa Kituo Dkt. Biteko amesema  “Nataka niwatoe wasiwasi kuwa jambo hili ni letu sote kwa kuwa majengo haya yatatumika kwetu sote. Nalibeba suala hili kwa uzito wake ili kilichoahidiwa kwa ajili ya kukamilisha ujenzi kipatikane kwa wakati,” 

Pia, ametoa wito kwa wadau mbalimbali 

kuunga mkono jitihada za kuwezesha mbio hizo kufanyika kwa ustadi mkubwa na kwa kuwa zimeonesha kupitia mshikamano, wanaweza kufanikisha malengo makubwa ya kijamii na kielimu. Sambamba na kuhimiza  uongozi wa Chuo kuandaa namna ya kukutanisha wadau zaidi ili kuchangia fedha za kukamilisha ujenzi wa kituo.

Vilevile, Dkt. Biteko amempongeza Mkuu wa Chuo Kikuu cha Dar es Salaam na Rais wa Awamu ya Nne Mhe. Dkt. Jakaya Mrisho Kikwete kwa usimamizi wake katika shughuli za maendeleo ya Chuo hicho.

Kwa upenda wake, Mkuu wa Chuo Kikuu cha Dar es Salaam na Rais Mstaafu Mhe. Dkt. Jakaya Mrisho Kikwete amesema kuwa Chuo hicho kinathamini mchango wa Serikali katika ujenzi wa Kituo hicho cha wanafunzi.

Naibu Makamu Mkuu wa Chuo cha Dar es Salaam (Utawala na Fedha), Prof. Bernadeta Kilian amesema Chuo hicho kilianzisha ujenzi wa kituo cha wanafunzi kwa ajili ya kupumzika na kukuza uwezo wa kubuni au kupata mawazo Mapya.